Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 156 Hüküm no: 118 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çelebi b. Yunus ile Nasrullah Çelebi b. Ahmed aralarındaki davada, Abdi Çelebi’nin kâriz masrafını üstlenmesi üzerine anlaştıkları Husûs-ı âti’l-beyânın mahallinde istimâ‘ ve ketb ve keşif ve tahrîr için savb-ı şer‘-i athardan bi’l-iltimâs ba‘s olunan keşif nâibi umdetü’l-müderrisîni’l-kirâm Mevlânâ Abdurrahman Efendi b. el-merhûm Mustafa Efendi hâssa mi‘mârlarından Mehmed Halîfe b. İsmail ile Mahmiye-i İstanbul’da Tercümân Yunus Mahallesi’nde vâki‘ Emine ve Zâhide nâm sâhibetü hayrın evkāfı müsakkafâtından bir bâb muhterik menzil arsası üzerine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde arsa-yı merkūmeye bi’l-icâreteyn mutasarrıf olan bâ‘isü hâze’l-kitâb Abdi Çelebi b. Yusuf yine mahalle-i merkūmede vâki‘ sâhibü’l-hayr Kızıl el-Hâc Hüseyin Evkāfı müstegallâtından bir bâb muhterik menzil arsasına bi’l-icâreteyn mutasarrıf olan Nasrullah Çelebi b. Ahmed muvâcehesinde vakf-ı evvelin kāimmakām-ı mütevellîsi Hâfız Mehmed Efendi b. Abdi ile vakf-ı sânî mütevellîsi Hâfız Ali Efendi b. Mustafa Efendi hâzırân oldukları hâlde kable’l-harîk menzilimin sakfının saçağı suyunun nısfı kendi havluma nısfı âharı kadîmden bi-hakkın mezbûr Nasrullah Çelebi tasarrufunda olan işbu arsaya akagelip miyâh-ı müctemi‘a kefgîr ile benim tasarrufumda olan menzilim altından ana kârîzine cereyân edegelmişiken hâlâ menzili vaz‘-ı kadîmî üzere binâ ve saçağı suyunu ber-minvâl-i muharrer kadîmîsi üzere icrâ murâd eylediğimde mümâna‘at eder suâl olunup mümâna‘atdan men‘ olunmak matlûbumdur dedikde gıbbe’s-suâl mezbûr Nasrullah Çelebi cevâbında fi’l-hakīka kable’l-harîk mezbûr Abdi Çelebi’nin menzilinin saçağı suyunun nısfı benim tasarrufumda olan işbu arsaya akagelip lâkin zikri mürûr eden kefgîr ve kâriz yolları bozuldukça ta‘mîri masrafında bana cefâ edip bi’d-defa‘ât masrafını kendim çekmekle mutazarrırım saçağı suyunu bi’l-külliye kendi arsası cânibine tahvîl eylesin dedikde mezbûr Abdi Çelebi ba‘de’l-yevm kefgîr ve kâriz masrafını müstakilen kendi çekmek üzere ta‘ahhüd edip bu vech üzere terâzîlerini mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr Hüseyin Çelebi b. Ahmed ve Muhzır Ahmed ve Muhzır Mustafa Çelebi b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 20 Rebî‘ülâhir sene [1]143. Şuhûdü’l-hâl: Müezzinzâde Şeyh Mehmed Efendi b. İbrahim, Ahmed Efendi b. Mustafa, es-Seyyid Ömer Çelebi b. İbrahim, Ahmed Çelebi b. Mehmed, İbrahim Beşe b. Hüseyin, Mehmed Çelebi b. Mehmed, Mumcu el-Hâc Ali b. Ali, Mehmed Beşe b. Mehmed Harbeci.