Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 157 Hüküm no: 119 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Halil ile kocası Bostancı Musa Beşe’nin muhala‘a yoluyla boşandıkları Muhâla‘a. Mahrûse-i Galata’ya tâbi‘ kasaba-i Tophane mahallâtından Firuzağa Mahallesi sâkinelerinden olup zâtı Ahmed Beşe b. Mehmed ve Mustafa b. Halil nâm kimesneler ta‘rîfleriyle mu‘arrefe olan Âişe bt. Halil nâm hatun meclis-i şer‘-i hatîr-i lâzımü’t-tevkīrde zevc-i dâhili işbu râfi‘u’l-kitâb Bostanî Musa Beşe b. Ramazan nâm kimesne mahzarında ikrâr ve takrîr-i kelâm edip mezbûr Bostanî Musa Beşe zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan üç bin altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 Rebî‘ülâhir sene [1]143. Şuhûdü’l-hâl: Mehmed Beşe b. Mustafa, Mustafa Beşe b. Halil, Ahmed Beşe b. Mehmed, Ahmed Beşe b. Hasan, Salih Beşe mübâşir, Ahmed Çelebi b. Hüseyin, Mustafa Çelebi b. Hasan.