Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 158 Hüküm no: 120 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un vakfettiği evin Molla Halil b. Hüseyin’e tevcih olunduğu Tevcîh-i menzil. Ashâb-ı hayrâtdan Fâtıma nâm sâhibetü’l-hayrın süknâsı sulehâ ve fukarâdan bir recül-i sâlihe meşrûta vakfı olup mahmiye-i İstanbul’da Sancakdâr Hayreddin Mahallesi’nde vâki‘ bir tarafdan ba‘zan Mustafa Çelebi tasarrufunda olan vakıf menzil ve ba‘zan Tesbîhcizâdeler tasarruflarında olan vakıf menzil ve ba‘zan Davud Ağa tasarrufunda olan vakıf menzil ve bir tarafdan İbrahim Çavuş veresesi tasarruflarında olan vakıf menzil ve ve bir tarafdan ba‘zan Müstedam Çavuş Vakfı odaları ve ba‘zan Tesbîhcizâdeler mülkleri ve bir tarafdan tarîk-i âm ile mahdûd iki bâb tahtânî oda ve bir sofa ve kenîf ve bi’r-i mâ ve bahçe ve havluyu müştemil vakıf menzile ber-mûceb-i şart-ı vâkıf[e] tevcîh-i hâkimü’ş-şer‘le mutasarrıf olan Derzi Ali nâm kimesne fevt olup süknâ-yı menzil-i mezbûr mahlûl olmağla süknâ-yı menzil-i mezbûru hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri ber-mûceb-i şart-ı vâkıf[e] sulehâ ve fukarâdan olup süknâya eşedd-i ihtiyâc ile muhtâc idiği ihbâr olunan Molla Halil b. Hüseyin’e tevcîh ve tasarrufi’çün kıbel-i şer‘den izin-birle mâ-hüve’l-vâki‘ bi’t-taleb ketb olundu. Fî 15 Rebî‘ülâhir sene [1]143. Şuhûdü’l-hâl: İmâm Salih Efendi b. Mehmed, Mehmed Çelebi b. Salih, Molla Abdullah b. Kayyum, İbrahim Çelebi b. Şa‘ban, Hâfız Mehmed Efendi b. İbrahim.