Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 158 Hüküm no: 121 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’ın Galata’daki yağkapanı kâtipliğinden kendi rızasıyla ayrıldığı İşbu berât-ı âlîşânın sâhibi olan Mehmed b. Abdullah meclis-i şer‘de takrîr-i kelâm edip mahrûse-i Galata’da vâki‘ yağ kapanının bilâ-ta‘yîn kitâbeti bundan akdem bana tevcîh ve yedime berât-ı âlîşânın verilmişidi lâkin kapan-ı mezbûrda vezn ve tevzî‘ olunan revgan-ı sâde ve mum yağı ve sâir emti‘a-i mütenevvi‘anın kitâbetinde ve hesâbında âciz ve kâsir olduğumdan tüccârın emvâli ve gümrük ahvâlinin ihtilâline bâ‘is olduğu mukarrer ve bir vechile uhdesinden gelmeğe kudretim olmamağın mukaddemâ gümrük tarafından ta‘yîn olunup eben-an-ceddin bi’l-cümle kitâb ve hesâb emirlerinde kemâl-i resh ve mahâreti olmağla gümrük emîni ve tüccâr tâifesinin muhtârları olan sâhib-i evveli Yakooğlu demekle ma‘rûf bâ‘isü hâze’s-sifr ( ) nâm Yahûdi[ye] yine kitâbet-i mezbûreyi hüsn-i rızâ ve ihtiyârım ile ferağ ve kasr-ı yed ve berâtımı yedine teslîm eyledim. Vech-i meşrûh üzere hüccet olunup mûcebince kitâbet-i mezbûre Yahûdi-i merkūmun üzerine kayd ve yedine mücedded berât-ı âlîşân verilip kemâ-fi’l-evvel kapan-ı mezbûrda kâtib olsun dedikde mâ-vaka‘a bi’t-taleb ketb olundu. Fi’l-yevmi’l-ışrîn min-şehri Rebî‘ülâhir li-sene selâse ve erba‘în ve mi’e ve elf. Şuhûdü’l-hâl: Mehmed Çelebi b. Abdullah, İbrahim b. Mustafa, Mustafa b. Mehmed, Mehmed b. Ahmed, Mehmed b. Hüseyin, Salih b. Süleyman.