Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 159 Hüküm no: 122 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun b. Mehmed’in Molla Gürânî Mahallesi’ndeki evini Mahmud Ağa b. Ahmed’e sattığı Mübâya‘a. Mahmiye-i İstanbul’da Molla Gürânî Mahallesi sâkinelerinden <> Hadice Hatun bt. Mehmed b. Abdullah tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Süleyman Efendi b. Ahmed ve İbrahim Efendi b. Mustafa şehâdetleriyle sâbit ve sübût-ı vekâletine hükm-i şer‘î lâhık olan Mehmed Beşe b. Hasan nâm kimesne meclis-i şer‘-i şerîf-i enverde Dergâh-ı âlî yeniçerilerinin yirmi beşinci bölüğün çorbacısı işbu bâ‘isü’l-kitâb Mahmud Ağa b. Ahmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Hadice Hatun’un yedinde mülk ve hakkı olup mahalle-i mezbûrede vâki‘ bir tarafdan Mustafa Ağa b. Mehmed menzili ve bir tarafdan Aynacı el-Hâc Süleyman b. Ahmed menzili ve bir tarafdan el-Hâc Halil Efendi b. İbrahim menzili ve bir tarafdan tarîk-i âm ile mahdûd fevkānî üç bâb oda ve bir sofa ve tahtânî bir bâb oda ve bir matbah ve kenîf ve bahçe ve bir köşk ve bir bi’r-i mâ ve bir mikdâr havluyu müştemil mülk menzilini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile merkūm Mahmud Ağa’ya bin yüz altmış guruşa bey‘ ve temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr bin yüz altmış guruşu merkūm Mahmud Ağa yedinden tamamen ahz u kabz eyledi fîmâ ba‘d menzil-i mahdûd-ı mezbûr merkūm Mahmud Ağa’nın mülk-i müşterâsı ve hakk-ı sırfı olup müvekkilem mezbûre Hadice Hatun’un kat‘â alâka ve medhali kalmamışdır. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 20 Rebî‘ülâhir sene [1]143. Şuhûdü’l-hâl: Umdetü’l-müderrisîni’l-kirâm Süleyman Efendi b. Ahmed, Molla Gürânî imâmı el-Hâc Halil Efendi b. İbrahim, Mehmed Efendi b. Abdurrahman, İbrahim Efendi b. Mustafa, Ali Odabaşı b. Hasan, Berber el-Hâc Mustafa b. Mehmed, el-Hâc Mehmed b. Mustafa, Veli Ağa b. Ömer, Hasan Efendi b. Osman, Mehmed Çelebi b. İbrahim, Mustafa Çelebi b. Mehmed, Mehmed Çelebi b. Ahmed, es-Seyyid Mehmed Efendi mütevellî-i Molla Gürânî, Molla Mustafa b. Halil.