Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 164 Hüküm no: 128 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamaşırcı esnafının, kethüdaları Mustafa b. Mehmed’den memnun oldukları Bâ-imzâ-i hazret-i efendi, câmeşûycuların hücceti. Mahmiye-i İstanbul ve Üsküdar ve Galata ve hâric-i kal‘ada vâki‘ câmeşûy ve kebe ve kilim gassâllarından Mehmed b. Ali ve Hasan Beşe b. Osman ve Ali b. Ebûbekir ve Hüseyin Beşe b. Hasan ve Hasan Beşe b. Mehmed ve Ömer b. el-Hâc Hüseyin ve Molla Ömer b. Osman ve Molla Osman b. Süleyman ve Ali Beşe b. Mehmed ve İbrahim Beşe b. Süleyman ve İbrahim b. Mustafa ve Ahmed Çelebi b. Şa‘ban ve İbrahim b. Mustafa ve Halil Beşe b. Ali ve Mehmed Çelebi b. Mustafa ve İsmail Beşe b. Hasan ve Hüseyin b. Bayram ve Hatîbzâde Mehmed Çelebi b. Abdullah ve Topal Ali Beşe b. Abdülbâki ve Ali Beşe b. Abdullah ve Ahmed b. Mehmed ve Mustafa b. Ahmed ve Abdurrahman b. Halil ve Abdullah b. Mustafa ve İbrahim b. Mustafa ve Kır Mehmed b. Ahmed ve sâirleri meclis-i şer‘-i şerîf-i enverde bâ-berât-ı âlîşân kethüdâları olan işbu râfi‘u’l-vesîka Mustafa b. Mehmed nâm kimesne mahzarında her biri ikrâr ve takrîr-i kelâm edip mezbûr Mustafa altı seneden berü kethüdâmız olup beynimizde olan umûrumuza nizâm vermeğin kat‘â bir ferde zulüm ve te‘addîsi olmamağın cümlemiz mezbûr kethüdânın evzâ‘ ve etvârından râzı ve hoşnûdlarız deyü hüsn-i hâlini her biri ba‘de’l-ihbâr mezbûr kethüdâ ile târih-i kitâba gelince beynimizde cereyân eden ahz u i‘tâya müte‘allika âmme-i de‘âvî ve mütâlebât ve muhâsamâtdan her birimiz kethüdâ-yı mezbûru ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Rebî‘ülâhir sene [1]143. Şuhûdü’l-hâl: Mehmed Çelebi b. Abdullah, Salih b. Süleyman, İbrahim b. Mustafa, Abdullah b. Mustafa.