Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 164 Hüküm no: 129 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başmukataa hocası Mehmed Efendi b. Mehmed Ağa’nın Molla Mehmed b. Yahya üzerine açtığı alacak davasından vazgeçtiği Mahmiye-i İstanbul’da Sofular Mahallesi ahâlîsinden umdetü ashâbü’t-tastîr ve’r-rakam zübdetü erbâbi’t-tahrîr ve’l-kalem hâlâ Başmukāta‘a hocası Mehmed Efendi b. Mehmed Ağa nâm kimesne meclis-i şer‘-i hatîr-i lâzımü’t-tevkīrde ikrâr-ı tâm ve takrîr-i kelâm edip vilâyet-i Rumeli’nde vâki‘ nefs-i Köstendil sancağının aded-i ağnâm ve cizye-i Kıbtiyân mukāta‘alarını gāib ani’l-meclis Molla Mehmed b. Yahya b. Abdullah nâm kimesneden bundan akdem bedel-i ma‘lûm mukābelesinde deruhde ve iltizâm eylediğimden sonra mârru’z-zikr mukāta‘aların asıl bedel-i iltizâmından üç yüz guruş zarâr etmişidim deyü gāib-i mezbûr Molla Mehmed’den taleb ve da‘vâ sadedinde olduğumda mezbûr Hasan Bey dahi gāib-i mezbûr için mâlından teberru‘an bana seksen guruş def‘ ve teslîm eyledikde ben dahi yedinden tamamen ahz u kabz ve umûruma sarfla istihlâk eylediğimden sonra husûs-ı mezbûra müte‘allika âmme-i de‘âvî ve kâffe-i mütâlebâtdan ve muhâsamâtdan gāib-i mezbûr Molla Mehmed’in zimmetini ibrâ-i âm ile ibrâ ve iskāt eylediğimde mezbûr Hasan Bey dahi bana medfû‘u olan meblağ-ı müstehlek-i mezbûr seksen guruşa müte‘allika âmme-i da‘vâdan benim zimmetimi ibrâ ve iskāt etmeğin min-ba‘d birbirimiz ile vechen mine’l-vücûh kat‘â da‘vâ ve nizâ‘ ve husûmetimiz kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 Rebî‘ülâhir sene [1]143. Şuhûdü’l-hâl: Mehmed Ağa b. Ahmed, Ömer Ağa b. Ahmed, Murtaza Ağa b. Mustafa.