Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 165 Hüküm no: 130 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed ile kocası Hüseyin Beşe b. Mehmed’in muhala‘a yoluyla boşandıkları Muhâla‘a. Mahrûse-i Galata mahallâtından Kulaksız Mahallesi sâkinelerinden olup zâtı Mustafa Efendi b. Salih ve Mustafa b. Davud nâm kimesneler ta‘rîfleriyle mu‘arrefe olan Fâtıma bt. Mehmed nâm hatun meclis-i şer‘-i şerîf-i enverde zevc-i dâhili işbu râfi‘u’l-vesîka Hüseyin Beşe b. Mehmed mahzarında ikrâr ve takrîr-i kelâm edip mezbûr Hüseyin Beşe zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh üç [üç bin] akçe mehr-i müeccelimin altı yüz akçesini bana def‘ ve teslîm ben dahi yedinden ba‘de’l-kabz bâkī iki bin dört yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a eylediğimde ol dahi vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Rebî‘ülâhir sene [1]143. Şuhûdü’l-hâl: Mehmed Çelebi b. İsmail, Mehmed Beşe b. Mehmed, es-Seyyid Osman b. Mustafa, Mustafa b. Ahmed, İbrahim b. Mustafa.