Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 165 Hüküm no: 131 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in vâlidesi Emine bt. Mehmed’e eşya satışı Eşyâ mübâya‘ası. Mahmiye-i İstanbul’da Ahırkapı kurbünde Akbıyık Mahallesi sâkinelerinden Hadice bt. Mehmed nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde vâlidesi işbu bâ‘isetü’l-vesîka Emine bt. Mehmed nâm hatun mahzarında ikrâr ve takrîr-i kelâm edip eşyâ-i memlûkemden bir cevâhir kuşak ve bir sim kuşak ve bir incili kuşak ve bir çift zümrüd küpe ve iki aded telli hatâyî kaftan ve iki entâri ve bir kermesûd kaftan ve bir dîbâ entâri ve bir dîbâ kaplı kākum kürk ve bir çukaya kaplı kākum kürk ve bir sof ferâce ve bir çuka ferâce ve on aded minder ve iki aded döşek ve bir orta keçesi ve üç aded yan keçesi ve on aded yastık ve altı aded yorgan ve sekiz çârşeb ve iki ocak yaşmağı ve dört tencere ve on sahan ve bir güğüm ve bir kazgan ve bir leğen ma‘a ibrik ve altı lenger bir meydân sini ve bir sagīr sini ve iki hoşâb tası ve bir tâbe ve iki sandık ve bir hamam rahtı ve iki serpûşumu tarafeynden îcâb ve kabûlü hâvî bey‘-i bâtt-ı sahîh-i şer‘î ile vâlidem mezbûre Emine Hatun’a bi-safkatin vâhidetin yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yüz guruş mütâlebesinden vâlidem mezbûre Emine Hatun’un zimmetini ibrâ-i âm ile ibrâ ve iskāt eyledim. Fîmâ ba‘d eşyâ-i muharrere-i mezkûre vâlidem mezbûre Emine Hatun’un mülk-i müşterâsı ve hakk-ı sırfı olup kat‘â benim alâka ve medhalim kalmamışdır. Keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 Rebî‘ülâhir sene [1]143. Şuhûdü’l-hâl: Hasan b. Abdullah, es-Seyyid Osman muhzır, Abdülkerim b. el-Hâc Hasan, Ali Bey b. Mehmed, Abdurrahman Bölükbaşı b. Mustafa, Musa b. Abdullah.