Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 166 Hüküm no: 132 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Recep Efendi’nin evinin hariciyesi ile bahçesinin yarısını kocası Salih Çelebi’ye sattığı Mübâya‘a. Mahmiye-i İstanbul’da Keçeci Pîrî Mahallesi’nde sâkine olup zâtı Ahmed Çelebi b. Mehmed ve diğer Ahmed Çelebi b. Bayram ta‘rîfleriyle mu‘arrefe olan Fâtıma bt. Receb Efendi nâm hatun meclis-i şer‘-i hatîr-i lâzımü’t-tevkīrde hâlâ zevcim işbu bâ‘isü’l-kitâb Salih Çelebi b. Halil mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan merhûm Ahmed Efendi veresesi menzili ve bir tarafdan el-Hâc Mehmed menzili ve bir tarafdan Canbaz es-Seyyid Yusuf Çelebi menzili ve bir tarafdan tarîk-i âm ile mahdûd dâhiliyesinde fevkānî bir oda ve tahtânî bir sagīr oda ve bir bi’r-i mâ ve kenîf ve bahçe ve hâriciyyesinde fevkānî bir bâb oda ve tahtânî bir bâb oda ve bir hamam ve bir kenîfi müştemil menzilin hâriciyyesi ile nısf bahçemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevcim mezbûr Salih Çelebi’ye iki yüz elli guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr iki yüz elli guruşu zevcim mezbûr Salih Çelebi yedinden tamamen ahz u kabz eyledim ba‘de’l-yevm menzil-i mahdûd-ı mezkûrun hâriciyyesiyle nısf bahçe zevcim mezbûr Salih’in mülk-i müşterâsı olup kat‘â benim alâka ve medhalim kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 Rebî‘ülâhir sene [1]143. Şuhûdü’l-hâl: Mehmed Efendi b. Mustafa, Ya‘kub b. el-Hâc Mehmed, es-Seyyid Mahmud b. es-Seyyid Mehmed, Abdullah b. Mehmed tâbi‘-i nâib efendi, Hasan b. Mustafa tâbi‘-i nâib efendi, Molla Mehmed b. Hüseyin, Alican b. Abdullah, Musa Çelebi.