Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 167 Hüküm no: 133 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Hasan ile Dergâh-ı âlî yeniçeri serdengeçti ağalarından Ahmed Ağa’nın muhala‘a yoluyla boşandıkları Kable’d-duhûl muhâla‘a. Mahmiye-i İstanbul’da Şeyh Ebu’l-Vefâ Mahallesi sâkinelerinden Rukiye bt. Hasan b. Abdullah nâm bikr-i bâliğa tarafından hul‘-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iyye ârifân Hasan Odabaşı b. Hüseyin ve el-Hâc İbrahim b. Abdullah nâm kimesneler şehâdetleriyle sâbit olan el-Hâc Ahmed b. el-Hâc Ahmed nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i gayr-ı dâhili bâ‘isü hâzihi’l-vesîka Dergâh-ı âlî -dâme mahfûfen bi’l-me‘âlî- yeniçerileri serdengeçdi ağalarından Ahmed Ağa b. Abdullah mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Rukiye ile mezbûr Ahmed Ağa beynlerinde münâferet ve şikāk vâki‘ olmağla mezbûr Ahmed Ağa müvekkilem mezbûreye mehr-i mu‘accel olmak üzere irsâl eylediği doksan sekiz aded tuğralı altın ve bir Cezayir ihrâmı ve on aded boyamayı mezbûr Ahmed Ağa’ya ba‘de’r-red ve’t-teslîm zimmetinde mütekarrir ve ma‘kūdun-aleyh olan otuz bin akçe mehr-i müeccelinden kable’d-duhûl lâzım gelen on beş bin akçe nısf mehr-i müecceli üzerine muhâla‘a-i sahîha-i şer‘iyye ile bi’l-vekâle muhâla‘a eylediğimde ol dahi mezbûru ba‘de’l-kabûl hukūk-ı zevciyyete müte‘allika âmme-i de‘âvî ve kâffe-i mütâlebât ve muhâsamâtdan her birimiz âharı bi’l-asâle ve bi’l-vekâle ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 17 Safer sene [1]143. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Salih Çelebi b. Süleyman, İbrahim Çelebi b. Süleyman, Ahmed b. el-Hâc Hasan, Süleyman b. Mehmed.