Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 168 Hüküm no: 134 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lağımcıbaşı Mustafa Ağa b. Abdullah’ın vefâtıyla çocuklarına kalan evin satışına çocukların vasisi olan Hadice b. Abdullah’a izin verildiği Mahmiye-i İstanbul’da Mi‘mâr Sinan Mahallesi ahâlîsinden iken bundan akdem vefât eden Lağımcıbaşı Mustafa Ağa b. Abdullah b. Abdullah’ın sulbî oğlu Mehmed ve sulbiye kızı Emine nâm sagīrlerin vâlideleri ve tesviye-i umûrlarına kıbel-i şer‘den mansûbe vasîleri olan bâ‘isetü’l-vesîka Hadice b. Abdullah nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde bi’l-vesâye takrîr-i kelâm ve tâ‘bir ani’l-merâm edip arsasının senede merhûm Âişe Hatun Vakfı’na üç yüz otuz akçe mukāta‘a-i kadîmesi ve ebniyesi müteveffâ-i mezbûrun ile’l-vefât yedinde mülk ve hakkı olup mahalle-i mezbûrede vâki‘ bir tarafdan fahrü’l-muhadderât Şerife Fâtıma Hanım mülkü ve bir tarafdan Ahmed Ağa menzili ve bir tarafdan mahalle-i [28a] mezbûre imâmına meşrût vakıf menzil ve bir tarafdan tarîk-i âm ile mahdûd hâriciyyesi fevkānî ve tahtânî iki bâb oda ve iki dükkân ve ahır ve kenîf ve bir mikdâr havluyu ve dâhiliyesi fevkānî iki bâb oda ve iki sofa ve tahtında bir matbah ve kilâr ve kenîf ve zât-ı eşcâr-ı müsmire ve gayr-ı müsmire bahçeyi müştemil mülk menzil ba‘de vefâtihi benim ile sagīrân-ı mezbûrân Mehmed ve Emine’ye intikāl edip lâkin menzil-i mezkûr müşrif-i harâb ve mâil-i türâb olup müteveffâ-i mezbûrun akār ve menkūl ve ism-i mâl ıtlâk olunur terekesinden kat‘â nesnesi olmamağla mukāta‘a-i mezkûreyi cânib-i vakfa edâ ve ta‘mîr ve meremmete sagīrân-ı mezbûrânın her vechile iktidârları olmayıp istidâne ile ta‘mîr olundukda hâsılı harcına vefâ etmediğinden mâ‘adâ müteveffâ-i mezbûrun altı yüz dört guruş müsbet deyni dahi zuhûr etmeğin menzil-i mezkûr ba‘de’l-müzâyede semen-i misli ile âhara bey‘ ve ba‘de edâ’i’d-deyn fazlası istirbâh ve istiğlâl olunmak benim ve sagīrân-ı mezbûrân haklarında min-külli’l-vücûh evlâ ve enfa‘ olmağla hakīkat-ı hâl husûs-ı mezkûre vukūfu olan işbu hâzirûn bi’l-meclis-i Müslimînden istihbâr ve haberleri tahrîr ve mûcebince kıbel-i şer‘den ber-vech-i muharrer bana izin verilmek bi’l-asâle ve bi’l-vekâle matlûbumdur dedikde hakīkat-ı hâl mezbûre Hadice Hatun’un bâlâda tafsîl ü beyân ve şerh ü a‘yân eylediği vech üzere olduğunu mahalle-i mezbûre ahâlîsinden zeyl-i kitâbda isimleri terkīm olunan Müslimînden her biri alâ-tarîkı’ş-şehâde ihbâr etmeleriyle menzil-i mezbûru ber-vech-i muharrer semen-i misli ile âhara bey‘e kıbel-i şer‘den mezbûre Hadice Hatun’a izin-birle mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-şehri Rebî‘ülâhir sene 1143. Şuhûdü’l-hâl: es-Seyyid Ali Efendi b. es-Seyyid Mehmed müezzin, Mustafa Çelebi b. Mehmed, Mehmed Beşe b. Abdullah, Osman Çelebi b. Abdülcabbar, es-Seyyid Ahmed b. Hasan.