Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 169 Hüküm no: 135 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merâmî el-Hâc Ahmed Efendi’nin evini yeniçeri çorbacılarından Mehmed Ağa’ya sattığı Mübâya‘a. Mahmiye-i İstanbul’da Timurhan [Demirhan] Mahallesi sâkinlerinden umdetü erbâbi’t-tahrîr ve’l-kalem zübdetü ashâbü’t-tastîr ve’r-rakam Merâmî el-Hâc Ahmed Efendi b. İvaz b. Abdurrahman tarafından husûs-ı âti’z-zikri ikrâra vekîl olduğu Molla Abdürrahim b. Salih Efendi ve Mustafa Çelebi b. Mehmed nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Molla Mehmed b. Hasan meclis-i şer‘-i <<şerîf>> hatîr-i lâzımü’t-tevkīrde Dergâh-ı âlî -dâme mahfûfen bi’l-me‘âlî- yeniçerilerinin ikinci bölüğüne mahsûs oda çorbacısı fahrü’l-akrân bâ‘isü hâze’l-kitâb Mehmed Ağa b. Ramazan mahzarında bi’l-vekâle ikrâr-ı tâm ve takrîr-i kelâm edip arsasının merhûm Abdülbâki nâm sâhibü’l-hayrın vakfına senede yedi yüz yirmi akçe mukāta‘ası ve üzerinde olan ebniye bâ-izn-i mütevellî akd-i âtî sudûruna değin müvekkilim mezbûr Merâmî el-Hâc Ahmed Efendi’nin yedinde mülk ve hakkı olup mahmiye-i mezbûrede Müftî Aliçelebi Mahallesi’nde vâki‘ bir tarafdan el-Hâc Süleyman nâm kimesne mülkü ve bir tarafdan Dimyadî Ahmed Çelebi mülkü ve bir tarafdan tarîk-i hâs ve bir tarafdan tarîk-i âm ile mahdûd dâhiliyesinde tabaka-i ulyâda iki bâb oda ve dehlîz ve vustâda bir oda ve bir tahta-pûşu ve câmekân ve bir matbah ve kenîf ve süflâda bir kilâr ve bir kârgîr mahzen ve eşcâr-ı müsmire ve gayr-ı müsmireli bahçe ve kenîf ve hâriciyyesinde ulyâda iki bâb oda ve bir sofa ve dehlîz ve vustâda iki bâb oda ve bir sofa ve dehlîz ve süflâda bir sagīr oda ve ahır ve bir bi’r-i mâ ve kenîf ve zât-ı eşcâr-ı müsmire ve gayr-ı müsmire bahçeyi muhtevî mülk menzilini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile iki bin yedi yüz elli guruşa mezbûr Çorbacı Mehmed Ağa’ya bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferağ ve tefvîz eylediğinde ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eyledikden sonra semeni olan meblağ-ı mezbûr iki bin yedi yüz elli guruşu müvekkilim mezbûr Merâmî el-Hâc Ahmed Efendi müşteri-i merkūm Çorbacı Mehmed Ağa yedinden tamamen ahz u kabz eyledi. Fîmâ ba‘d menzil-i mahdûd-ı mezkûrun ebniye-i memlûke-i mezkûresi mezbûr Mehmed Ağa’nın mülk-i müşterâsı ve arsa-yı merkūme dahi hakk-ı müfevvezi olup müvekkilim-i mezbûrun kat‘â alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Rebî‘ülâhir sene [1]143. Şuhûdü’l-hâl: Salih Efendi b. Mehmed Efendi el-imâm, Molla İbrahim b. Salih Efendi el-müezzin, İsmail Çelebi b. Mehmed, Mehmed b. Osman, Mehmed b. İbrahim, Abdürrahim b. Salih.