Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 170 Hüküm no: 136 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fakir olan el-Hâc Mustafa b. İbrahim’e oğlu Mehmed üzerinden nafaka bağlanması Nafaka. Mahmiye-i İstanbul’da Kadırga limanı kurbünde Bostancıbaşı Aliağa Mahallesi sükkânından işbu bâ‘isü’l-kitâb el-Hâc Mustafa b. İbrahim meclis-i şer‘-i hatîr-i lâzımü’t-tevkīrde sulbî kebîr oğlu Mehmed mahzarında takrîr-i kelâm ve bast-ı merâm edip ben fakīr ve ma‘ser[e] ve pîr ve kâr u kisbe bir vechile iktidârım olmamağla nafaka ve kisveye eşedd-i ihtiyâcım olmağın oğlum mezbûr Mehmed mûsir olmağla ber-vech-i muharrer nafaka ve kisve-bahâ için oğlum mezbûr üzerine kıbel-i şer‘den kadr-i kifâye akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi mezbûr el-Hâc Mustafa’nın nafaka ve kisvesi’çün oğlu mezbûr Mehmed üzerine bi’t-terâzî târih-i kitâbdan yevmî beş akçe nafaka farz ve takdîr edip meblağ-ı mefrûz-ı mezkûru ber-vech-i muharrer nafaka ve kisve-bahâ ve sâir levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer oğlu mezbûr Mehmed üzerine rücû‘a merkūm el-Hâc Mustafa’ya izin-birle mâ-vaka‘a bi’t-taleb ketb olundu. Fî-gurreti Cemâziyelevvel li-sene selâse ve erba‘în ve mi’e ve elf. Şuhûdü’l-hâl: İbrahim Efendi b. Ahmed, el-Hâc Mustafa b. Ömer, Mehmed Çelebi b. İbrahim, diğer Mehmed Çelebi b. Abdullah tahtacı.