Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 170 Hüküm no: 137 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslan Kalfa v. Dimitri’nin Mehmed Ağa b. Abdülbâki için inşa ettiği eve yaptığı harcamanın keşfi Mine’l-keşf. Husûs-ı âti’l-beyânın mahallinde ketb ü keşif ve takvîm ü tahrîri’çün sâdır olan fermân-ı âlîye imtisâlen kıbel-i şer‘den ba‘s ve irsâl olunan keşif nâibi umdetü’l-müderrisîni’l-kirâm Mevlânâ Abdurrahman Efendi b. el-merhûm Mustafa Efendi hâssa mi‘mârlarından Ali Halîfe b. Ahmed ve Süleyman Halîfe b. Abdi ile mahmiye-i İstanbul’da Karagümrük kurbünde Derviş Ali Mahallesi’nde vâki‘ Mehmed Ağa b. Abdülbâki’nin menziline varıp zeyl-i sifrde muharrerü’l-esâmî Müslimîn huzûrlarında akd-i meclis-i şer‘-i şerîf ettikde bâ‘isü hâze’r-rakīm Aslan Kalfa v. Dimitri meclis-i ma‘kūd-ı mezkûrda mezbûr Mehmed Ağa mahzarında takrîr-i kelâm ve tâ‘bir ani’l-merâm edip menzil-i merkūmu ber-vech-i âtî binâ etmek üzere mezbûr Mehmed Ağa <> bundan akdem benim ile altı yüz otuz guruş ve altı zirâ‘ çukaya götürü pazar[lık] edip ve bana beş yüz guruş verip ben dahi menzil-i merkūmun cemî‘ levâzım-ı binâsını iltizâm ve binâsına mübâşeret ettiğimden sonra kavl-i sâbıkā mugāyir ba‘zı ziyâde ve noksan iktizâ edip meblağ-ı mezbûr beş yüz guruşu ba‘de’s-sarf istidâne ile masrûfum ziyâde olmağın kadr-i ziyâdede ihtilâf ve beynimizde münâza‘a-ı vâkı‘a olup tevfîk kābil olmamağın hâlâ bilâ-hilâf kendim binâ eylediğim ebniyeye nazar ve ferden ferdâ defter ve izzetli mi‘mâr ağa yevm-i binâda olan fiyatını esâmîsi tahtında vaz‘ edip ba‘de’l-cem‘ masrafım her neye bâliğ olur ise makbûzumdur ziyâdesi alıverilmek matlûbumdur dedikde mi‘mârân-ı mezbûrân Müslimûn-ı hâzirûn ile mezbûr Mehmed Ağa muvâcehesinde binâ-i menzil-i merkūma nazar ve bennâ zirâ‘ıyla mesâha ve takvîm ve tahmîn eylediklerinde mecmû‘ sakf-ı menzil tûlen ve arzen bi-hesâb-ı terbî‘i iki yüz altmış bir buçuk zirâ‘ olup her zirâ‘ ellişer akçeden on üç bin altmış beş akçe ve hâriciyyede fevkānî odada devr şişeli lamba pervâzlı sülyen ve cengâr boyalı ve yine? terbî‘an kırk beş zirâ‘ tavan her zirâ‘ı altmışar akçeden iki bin yedi yüz akçe ve tûlânî on dört zirâ‘ sâde çift otuzar akçeden dört yüz yirmi akçe ve bektâşî davlunbazlı ocak ma‘a depe sekiz yüz kırk akçe ve kirişlerin beylik tabânı agova [ve] kuraniye tahta döşeme terbî‘an elli iki buçuk zirâ‘ her zirâ‘ı kırk beşer akçeden iki bin üç yüz altmış iki akçe ve tarafeyni iki kat sıvalı bâdemî çam dezgâhlı gülevi? üzeri mermer kireç dolma duvar terbî‘an yüz otuz beş buçuk zirâ‘ her zirâ‘ı ellişer akçeden altı bin yedi yüz yetmiş beş akçe ve Arabî kanadlı ağaç parmaklı boyalı çârçûbeli beş aded pencere ma‘a pervâz üçer yüz ellişer akçeden bin yedi yüz elli akçe ve döşeme kirişi için on aded ada çubuğu beheri altmışar akçeden altı yüz akçe ve bîrûnî bâdemî ve derûnî zi’l-bahâr beş çift çam duvar üçer yüz akçeden bin beş yüz akçe Arabî kanadlı iki sandık dolab dört yüz seksen akçe ve terbî‘an on üç zirâ‘ musandıra ve dolablar ve medine ve kapı seksenerden bin kırk akçe ve kapı arasında nîm şişeli terbî‘an iki zirâ‘ on sekiz parmak sâde tavan otuzardan yetmiş akçe ve terbî‘an üç zirâ‘ on parmak Ağova tahta perde yüz beş akçe ve bir medine yüz elli akçe ve Arabî kanadlı kemer çârçubeli kitâbeli oda kapısı ma‘a pervâz aded iki ikişer yüz kırkardan dört yüz seksen akçe ve …? açma sâde gülevi? tûlânî yirmi dört buçuk zirâ‘ yirmişerden dört yüz doksan akçe ve terbî‘an on buçuk zirâ‘ bağdâdî kafes iki yüz elli akçe ve dört aded dişbudak eğrisi seksenerden üç yüz yirmi akçe ve dokuz zirâ‘ yağmurluk tahtası on beşerden yüz otuz beş akçe ve üç aded oluk altmışar[dan] yüz seksen akçe ve yedi aded devr ve târ-ı sagīr? üçer yüz akçeden iki bin yüz akçe ve on bir aded kürsî taşı kırkardan dört yüz kırk akçe ve dört zirâ‘ duvar altmışardan iki yüz kırk akçe ve baca etrâfında terbî‘an dokuz buçuk zirâ‘ tahta perde otuzardan iki yüz seksen beş akçe ve oluk altında yedi kuraniye tahtası on beşerden yüz beş akçe ve hâriciyyesinde sofada devr şişeli mürtebâni boyalı tavan terbî‘an on dört zirâ‘ ellişirden yedi yüz akçe ve dehlîzde kezâlik on bir zirâ‘ tavan beş yüz elli akçe ve tarafeyni sıvalı dolma duvar elli yedi buçuk zirâ‘ ellişerden iki bin sekiz yüz yetmiş beş akçe ve terbî‘an dokuz zirâ‘ tahta döşeme kırk beşerden dört yüz beş akçe def‘a on dört zirâ‘ tahta döşeme altı yüz on dört akçe ve sâbıkā kebe iki aded pencere yedi yüz akçe ve sâbıkā kebe iki çift cam duvar altı yüz akçe ve dokuz zirâ‘ gülevi? yüz seksen akçe ve bir tarafı zi’l-bahâr iki kat bel tahtası on sekiz zirâ‘ kırkardan yedi yüz yirmi akçe def‘a nîm şişeli altı zirâ‘ bel tahtası otuzardan yüz seksen akçe ve nerdübân başında tarabuzan altı zirâ‘ kırkardan iki yüz kırk akçe ve dört ada çubuğu altmışardan iki yüz kırk akçe ve tavanı ve etrâf-ı dolma duvarı ile kayagan döşemeli terbî‘an üç zirâ‘ kenîf sekiz yüz kırk akçe serenleri orta sekiz zirâ‘ ova tahtası dokuz kademe nerdübân yedi yüz yirmi akçe ve haremde fevkānî kebîr oda elvân boyalı tavan terbî‘an otuz altı zirâ‘ on sekiz parmak altmışardan iki bin yüz altmış akçe ve terbî‘an kırk iki zirâ‘ tahta döşeme kırk beşerden bin sekiz yüz doksan akçe ve on üç zirâ‘ tûlânî çift yirmişerden iki yüz altmış akçe ve yirmi iki zirâ‘ gülevi? on beşerden üç yüz otuz akçe ve evsâf-ı sâbıkā ile mevsûf terbî‘an doksan bir zirâ‘ dolma duvar ellişerden dört bin beş yüz elli akçe ve sâbıkā kebe dört aded pencere bin dört yüz akçe ve sâbıkā kebe cam duvar dört çift bin iki yüz akçe ve sâbıkā kebe bir ocak sekiz yüz kırk akçe ve üç göz medine yüz elli akçe ve terbî‘an on üç zirâ‘ Arabî musandıra seksenerden bin kırk akçe ve takrîben dokuz zirâ‘ Bağdâdî kafes dört yüz yirmi beş akçe ve kapı arasında üstü döşemeli üç zirâ‘ tavan doksan akçe ve bir Arabî kapı iki yüz kırk akçe ve beş ada çubuğu altmışardan üç yüz akçe ve beş beylik tabanı yirmişerden yüz akçe ve kapı arasında iki zirâ‘ tahta perde altmış akçe ve haremde fevkānî sagīr odada nîm şişeli sülyen boyalı tavan on altı zirâ‘ on beş parmak kırkardan altı yüz kırk akçe kezâlik tahta döşeme altı yüz kırk akçe, ocak ve davlunbaz ve depe sekiz yüz kırk akçe ve bir tarafı sıvalı altmış iki zirâ‘ dolma duv[ar] kırk beşerden iki bin yedi yüz doksan akçe ve sâbıkā kebe iki pencer[e] yedi yüz akçe ve sekiz zirâ‘ gülevi? on beşerden yüz yirmi akçe ve tahta kanadlı yüklük iki yüz kırk akçe [29a] ve üç zirâ‘ tahta perde doksan akçe ve sâbıkā kebe bir kapı iki yüz kırk akçe ve dehlîzde devr sişeli sülyen boyalı yirmi üç zirâ‘ tavan ellişerden bin yüz elli akçe kezâlik tahta döşeme kırk beşerden bin otuz beşer akçe ve iki kat zi’l-bahâr şişeli altı zirâ‘ bel tahtası altmışardan üç yüz altmış akçe ve altı zirâ‘ tarabuzan iki yüz kırk akçe ve serenleri çifte sekiz on üç kademe nerdübân bin beş yüz akçe def‘a yedi zirâ‘ tarabuzan iki yüz seksen akçe bir pada[v]ra? on iki akçe ve dört buçuk zirâ‘ kayagan döşemeli nâ-tamam kenîf üç yüz altmış akçe vustâda tahta döşeme on dokuz zirâ‘ kırkardan yedi yüz altmış akçe ve dokuz zirâ‘ kerpiç duvar otuzardan iki yüz yetmiş akçe ve dokuz zirâ‘ nîm şişeli tahta perde iki yüz yetmiş akçe ve on bir kara sığır topacı ma‘a başlık üç bin dokuz yüz altmış akçe def‘a on bir zirâ‘ tahtânî oda tahta döşeme dört yüz kırk akçe ve dokuz zirâ‘ tahta perde iki yüz yetmiş akçe ve sıvasız altı zirâ‘ dolma duvar yüz seksen akçe def‘a beş zirâ‘ tahta döşeme iki yüz akçe ve bir kat bel tahtası on iki zirâ‘ buçuk üç yüz yetmiş beş akçe ve altı kademe nerdübân altı yüz akçe ve dört zirâ‘ tarabuzan yüz altmış akçe ve bir aded kestane direği elli akçe ve iki ıhlamur seksen akçe ve altı zirâ‘ tahta perde yüz seksen akçe ve bir dönme dolab yüz yirmi akçe ve matbahda dört zirâ‘ döşeme yüz altmış akçe ve matbah ocağı iki bin dört yüz akçe ve pencere iki yüz kırk akçe ve iki İzmigid [İznikmid] çubuğu yüz altmış akçe ve bir tel eğrisi seksen akçe ve bir döner dolab iki kapak altı yüz akçe ve on dört zirâ‘ kerpiç duvar beş yüz altmış akçe ve beş zirâ‘ karaağaç kapı dört yüz seksen akçe ve iki tahta dolab üç yüz akçe ve yirmi iki buçuk zirâ‘ tahta perde altı yüz yetmiş beş ve iki mahalde yine yirmi yedi zirâ‘ tahta perde yedi yüz doksan beş akçe ve hâriciyyede vustânî sagīr odada kirişleri mevcûd sâde tavan ve tahta döşeme on altışar zirâ‘ sekiz yüz akçe ve sâde parmaklık altmış akçe ve beş kademe nerdübân dört yüz seksen akçe ve altı zirâ‘ tahta perde yüz seksen akçe ve üç zirâ‘ tarabuzan yüz yirmi akçe ve Arabî kanadlı topaç çârçûbeli kilidli kapı yedi buçuk zirâ‘ bin beş yüz akçe ve hammâliye ve küfe ve kürek ve resen ve koğa ve ücret-i mesârif-i sâire altı bin yüz yirmi akçe cem‘an doksan yedi bin seksen dört akçe ile ancak olur deyü mi‘mârân-ı mezbûrân bi’l-ittifâk ba‘de’l-haber bi’l-fi‘il ser-mi‘mârân-ı hâssa izzetlü İbrahim Efendi dahi müfredât defteri esâmîsi taht-ı minvâl-ı muharrer üzere fiyatını vaz‘ ve yekûnu bi-aynihî meblağ-ı mezbûr olup bi-hesâb-ı guruş sekiz yüz dokuz guruş dört akçeye bâliğ olduğunu zeyl-i deftere kayd ve hatmeylediğini mevlânâ-yı mezbûr mahallinde tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Rebî‘ülâhir li-sene 1143. Şuhûdü’l-hâl: Berber Mehmed b. ( ), İbrahim Efendi, Bostanî Ahmed b. Halil.