Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 173 Hüküm no: 138 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mehmed’in Ali Efendi b. İsmail’e evlatlık olarak verdiği oğlu Mehmed’e nafaka bağlanması Tebennî. Dergâh-ı âlî -dâme mahfûfen bi’l-me‘âlî- yeniçerilerinin otuz birinci sekbanlara mahsûs oda neferâtından Ali Beşe b. Mehmed nâm kimesne meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka Ali Efendi b. İsmail nâm kimesne mahzarında takrîr-i kelâm ve bast ani’l-merâm edip işbu sulbî sagīr oğlum Mehmed’i bi-tarîkı’t-terebbî ve’t-tebennî mezbûr Ali Efendi’ye bundan akdem vaz‘ ve teslîm etmişidim lâkin oğlum sagīr-i mezbûr Mehmed’in mâlı olmayıp nafaka ve kisveye ihtiyâcı olmağla oğlum mezbûrun nafaka ve kisve ve sâir levâzım-ı zarûriyyesine kendi mâlından beher yevm onar akçe bana bi-şartü’r-rücû‘ harc ve sarf etmek üzere mezbûr Ali Efendi’ye emreylediğimde ol dahi ber-vech-i muharrer oğlum sagīr-i mezbûru infâk ve iksâya ta‘ahhüd ve iltizâm eyledi dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Rebî‘ülâhir sene 1143. Şuhûdü’l-hâl: Mehmed Ağa b. Mehmed, Mehmed Çelebi b. Mehmed, Salih Çelebi b. Süleyman, Ahmed Çelebi b. el-Hâc Hasan, Abdullah Çelebi b. Mustafa.