Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 174 Hüküm no: 139 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnafın isteği üzere İbrahim b. Hasan’ın mürekkepçiler esnafına kethüda tayin edildiği Mürekkebciler kethüdâsı nasb. Mahmiye-i İstanbul’da Sultan Bayezid-i Veli kurbünde vâki‘ mürekkebciler hırfetinin yiğitbaşıları olan Ali b. İbrahim ve üstâdlarından Hüseyin Halîfe b. Abdullah ve Halil b. Abdullah ve Derviş Mehmed b. Abdullah ve sâir ihtiyârları meclis-i şer‘-i hatîr-i lâzımü’t-tevkīrde her biri takrîr-i kelâm ve tâ‘bir ani’l-merâm edip bâ-hüccet-i şer‘iyye kethüdâmız olan Osman b. Abdullah bundan akdem fevt olup yeri hâlî olmağla yine üstâdlarımızdan işbu hâfızü’l-vesîka İbrahim b. Hasan nâm kimesne her vechile beynimizde olan umûrumuza ıttılâ‘-ı tammı olmağla nizâm-ı hâlimiz için kıbel-i şer‘den üzerimize kethüdâ nasb ve ta‘yîn olunmak matlûbumuzdur dediklerinde esnâf-ı mezkûrenin ber-vech-i muharrer nizâm-ı hâlleri’çün iltimâslarıyla muhtârları olan İbrahim Çelebi kıbel-i şer‘den üzerlerine kethüdâ nasb ve ta‘yîn olundukda ol dahi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Rebî‘ülâhir sene 1143. Şuhûdü’l-hâl: Hasan b. Mehmed, Abdullah b. Hasan, Mustafa b. Ahmed, Hüseyin b. Mehmed, Ali b. Ahmed, Receb b. Ali, Abdullah b. Ahmed.