Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 174 Hüküm no: 140 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden surre emini Hızır Çavuş Ağa’nın kethüdası Hüseyin Efendi’nin zimmetini vârislerin ibra ettiği Husûs-ı âti’l-beyânın mahallinde ketb ü tahrîri için bi’t-taleb kıbel-i şer‘-i kavîmden Mevlânâ es-Seyyid Ahmed Efendi irsâl olunup ol dahi Mahmiye-i İstanbul’da Molla Gürânî Mahallesi’nde işbu sene-i mübârekede surre emîni iken tarîk-i hacc-ı şerîfde vefât eden Hızır Çavuş Ağa b. Ferhad b. el-Hâc Mehmed’in hayâtında sâkin olduğu menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-i mezbûrun verâseti zevce-i menkûha-i metrûkesi Şehsuvar Hatun bt. Abdullah ile li-ebeveyn er karındaşı oğlu el-Hâc Veli Ağa b. Mustafa nâm kimesneye münhasıra olduğu tahakkukundan sonra mezbûre Şehsuvar Hatun tarafından husûs-ı âti’z-zikri ikrâra vekîl olduğu zât-ı mezbûreyi ârifân el-Hâc Salih b. Ramazan ve Osman Çelebi b. Ömer nâm kimesneler şehâdetleriyle sâbit olan el-Hâc Ahmed Ağa b. Mehmed nâm kimesne vekâleten ve mezbûr el-Hâc Veli Ağa asâleten meclis-i ma‘kūd-ı mezkûrda müteveffâ-i mezbûrun kethüdâsı işbu bâ‘isü’l-kitâb Hüseyin Efendi b. Mahmud nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip mezbûr Hüseyin Efendi mûrisimiz müteveffâ-i mezbûrun hayâtında kethüdâsı olmağla beynlerinde cereyân eden ahz u i‘tâyı hesâb eylediğimizde mezbûr Hüseyin Efendi’nin zimmetinde bir akçe ve bir habbe zuhûr etmemeğin husûs-ı mezbûra ve sâire müte‘allika âmme-i da‘vâdan bi’l-asâle ve bi’l-vekâle mezbûr Hüseyin Efendi’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledik ba‘de’l-yevm husûs-ı mezkûra müte‘allik birbirlerimiz ile vechen mine’l-vücûh ve sebeben mine’l-esbâb kat‘â da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Abdullah b. Mehmed ve Mehmed b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-şehri Rebî‘ülâhir sene 1143. Şuhûdü’l-hâl: İmâm el-Hâc Halil Efendi b. İbrahim, İmâm el-Hâc İsmail Efendi b. el-Hâc Abdullah, İsmail Ağa Şerefzâde, Ahmed Çavuş Ağa b. Mehmed, Mustafa Çavuş Ağa b. Abdurrahman, el-Hâc Halil Efendi b. Abdullah, Ahmed Bey b. Mehmed, Mahmud b. el-Hâc Ali, el-Hâc Mehmed b. Mehmed, el-Hâc Abdullah b. İbrahim, el-Hâc Hüseyin b. Veli, el-Hâc Halil b. Ahmed.