Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 175 Hüküm no: 141 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden surre emini Hızır Çavuş’un vârislerinin birbirlerinin zimmetlerini ibra ettikleri Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden Mevlânâ es-Seyyid Ahmed Efendi irsâl olunup ol dahi Mahmiye-i İstanbul’da Molla Gürânî Mahallesi’nde işbu sene-i mübârekede surre emîni iken tarîk-i hacc-ı şerîfde vefât eden Hızır Çavuş Ağa b. Ferhad b. el-Hâc Mehmed’in hayâtında sâkin olduğu menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-i mezbûrun verâseti zevce-i menkûha-i metrûkesi Şehsuvar Hatun bt. Abdullah ile li-ebeveyn er karındaşı oğlu el-Hâc Veli Ağa b. Mustafa nâm kimesneye münhasıra oldukdan sonra mezbûre Şehsuvar Hatun tarafından husûs-ı âti’z-zikri ikrâra vekîl olduğu zât-ı mezbûreyi ârifân el-Hâc Salih b. Ramazan ve Osman Çelebi b. Ömer şehâdetleriyle sâbit olan el-Hâc Ahmed Ağa b. Mehmed meclis-i ma‘kūd-ı mezkûrda müteveffâ-i mezbûrun hîn-i vefâtında tarîk-i mezbûrda terekesini kabz ve sâir veresesine îsâle vasiyy-i muhtârı ve terekesine bi’l-vesâye vâzı‘u’l-yed olan işbu bâ‘isü’l-kitâb mezbûr el-Hâc Veli Ağa mahzarında bi’l-vekâle ikrâr ve takrîr-i kelâm edip vasiyy-i mezbûr el-Hâc Veli Ağa müvekkilem mezbûrenin zevci müteveffâ-i mezbûr Hızır Çavuş Ağa zimmetinde mütekarrir ve ma‘kūdun-aleyh iki yüz guruş mehr-i müeccelini tereke-i müteveffâ-i mezbûrdan olmak üzere müvekkilem mezbûreye def‘ ve teslîm ol dahi yedinden tamamen ahz u kabz eyledikden sonra husûs-ı mezbûra ve sâire müte‘allika âmme-i da‘vâdan mezbûr el-Hâc Veli Ağa’nın zimmetini ibrâ-i âmm-ı râfi‘u’l-hısâm ile ibrâ ve iskāt eyledikde vasiyy-i mezbûr el-Hâc Veli Ağa dahi husûs-ı mezbûra ve sâire müte‘allika âmme-i da‘vâdan kezâlik müvekkilem-i mezbûreyi ibrâ-i âmm-ı râfi‘u’l-hısâm ile ibrâ ve iskāt edip ba‘de’l-yevm birbirleriyle vechen mine’l-vücûh ve sebeben mine’l-esbâb kat‘â da‘vâ ve nizâ‘ ve husûmetleri kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ma‘an ba‘s olunan Abdullah b. Mehmed ve Mehmed b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 24 Rebî‘ülâhir sene [1]143. Eş-şâhidûn: Es-sâbikūn.