Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 176 Hüküm no: 142 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in boşandığı eşi Fâtıma bt. Mehmed’in yanındaki kızı Hadice’ye nafaka ödemesi Nafaka. Mahrûse-i Galata mahallâtından Kulaksız Mahallesi sâkinelerinden olup zâtı ta‘rîf-i şer‘î ile mu‘arrefe olan işbu râfi‘atü’l-vesîka Fâtıma bt. Mehmed nâm hatun meclis-i şer‘-i şerîf-i enverde zevc-i sâbıkı Hüseyin b. Mehmed nâm kimesne mahzarında takrîr-i kelâm ve bast-ı merâm edip mezbûr Hüseyin firâşından hâsıla ve benden mütevellide hâlâ bi-hakkı’l-hıdâne hacr ve terbiyemde işbu Hadice nâm sagīrenin nafaka ve kisveye ihtiyâcı olmağla babası mezbûr Hüseyin üzerine kıbel-i şer‘den kadr-i kifâye nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīre-i mezbûre Hadice’nin nafaka ve kisvesi’çün tarafeynin rızâsıyla târih-i kitâbdan beher yevm babası mezbûr Hüseyin üzerine dörder akçe farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisvesi’çün harc ve sarfa ve lede’l-iktizâ istidâneye ve inde’z-zafer babası Hüseyin üzerine rücû‘a mezbûre [30a] Fâtıma Hatun’a izin verilmeğin mâ-vaka‘a bi’t-taleb ketb olundu. Fî 15 Rebî‘ülâhir sene [1]143. Şuhûdü’l-hâl: Mustafa Efendi b. Salih Efendi, Mustafa b. Davud, Mehmed b. İsmail, es-Seyyid Osman b. Mustafa.