Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 177 Hüküm no: 143 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa ile kocası Mustafa b. Hasan’ın muhala‘a yoluyla boşandıkları Muhâla‘a. Mahmiye-i İstanbul’da Alipaşa-yı atîk Mahallesi sâkinelerinden olup zâtı mahalle-i mezbûre imâmı el-Hâc İsmail Efendi b. Derviş ve İbrahim b. Ali nâm kimesneler ta‘rîfleriyle mu‘arrefe olan Âişe bt. Mustafa nâm hatun meclis-i şer‘-i şerîf-i enverde zevc-i dâhili işbu râfi‘u’l-vesîka Mustafa b. Hasan nâm kimesne mahzarında ikrâr ve takrîr-i kelâm edip mezbûr Mustafa zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve kendiye medfû‘um olan bir altın küpe bedel-i hul‘ olup ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a eylediğimde ol dahi vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 Rebî‘ülâhir sene [1]143. Şuhûdü’l-hâl: Salih Beşe b. Mustafa, Süleyman Çelebi b. Mehmed, Salih b. Mehmed, Ahmed b. Hüseyin Paşa, Ahmed b. Ali, Yusuf Beşe b. Abdullah, İbrahim b. Mustafa, Abdullah b. Mustafa.