Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 177 Hüküm no: 144 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuğcu el-Hâc Mehmed’in evinin yarısını ve eşyasının bir kısmını eşi Ayşe bt. Abdullah’a sattığı Mahmiye-i İstanbul’da Debbâğ Yunus Mahallesi sükkânından Tuğcu el-Hâc Mehmed b. Lütfullah nâm kimesne meclis-i şer‘-i şerîf-i enverde hâlâ zevce-i menkûhası işbu râfi‘atü’l-kitâb Âişe bt. Abdullah nâm hatun mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Süleyman Efendi kerîmesi ve bir tarafdan Halil Çavuş ve bir tarafdan Müezzin Ali Çelebi menzilleri ve bir tarafdan tarîk-i âm ile mahdûd fevkānî üç bâb oda ve tahtânî bir bâb oda ve bir sofa ve bahçe ve kenîf ve bir mikdâr havluyu müştemil mülk menzilin nısf-ı şâyi‘ini bi-cümleti’t-tevâbi‘ ve’l-levâhık iki yüz elli guruşa ve eşyâ-i memlûkemden on köhne kadife yastık ma‘a gılâf ve beş minder ve bir orta keçesi ve iki yemenî mak‘ad ve bir beledî döşek ve üç yemenî yorgan ve beş sahan ma‘a kapak ve beş sâde sahan ve üç tencere ve iki kebîr ve sagīr sini ve kefgîr kepçe ve bir leğen ma‘a ibrik ve bir tâbe ve iki tas ve üç kahve ibriği ve iki sagīr sini ve iki köhne kapı perdemi elli guruşa ki cem‘an üç yüz guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz <> ve kabûl eyledikden sonra semenleri olan meblağ-ı mezbûr üç yüz guruş mütâlebesinden zevcem mezbûre Âişe’nin zimmetini ibrâ-i âm ile ibrâ ve iskāt eyledim ba‘de’l-yevm menzil-i mahdûd-ı mezbûrun nısf-ı şâyi‘i ile eşyâ-i muharrere-i mezbûre zevcem mezbûre Âişe’nin mülk-i müşterâsı olup kat‘â benim alâka ve medhalim kalmamışdır. Keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 27 Rebî‘ülâhir sene [1]143. Şuhûdü’l-hâl: Hasan Efendi b. Ahmed el-imâm, İsmail Halîfe b. Ali el-müezzin, Mehmed Efendi b. Mustafa el-kayyûm, Mehmed Çelebi b. Hasan, Şahin b. Abdullah, Abdullah Çelebi b. Abdullah, İbrahim Beşe b. Halil, Abdullah b. Mustafa, İbrahim b. Mustafa, Mehmed Çelebi b. Abdullah.