Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 178 Hüküm no: 145 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Hüseyin Beş ile Bedros v. Bogos’un aralarındaki alacak davasında sulh oldukları Bâ-imzâ-i hazret-i efendi, sulh. Mahmiye-i İstanbul’da Aksaray kurbünde Çakırağa Mahallesi ahâlîsinden es-Seyyid Hüseyin Beşe b. es-Seyyid Hüseyin nâm kimesne meclis-i şer‘-i hatîr-i lâzımü’t-tevkīrde bâ‘isü hâze’s-sifr Bedros v. Bogos nâm zimmî muvâcehesinde ikrâr-ı tâm ve takrîr-i kelâm edip bundan akdem otuz iki Mısrî zincirli altın ve otuz dört guruş kıymetli dokuz zirâ‘ lâciverdî çuka ve on guruş kıymetli bir yeşil mukaddem kuşağımı sana emâneten def‘ ve teslîm eylemişidim deyü mesfûr Bedros’dan taleb ve da‘vâ sudûrunda olduğumda ol dahi inkâr etmeğin beynimizde münâza‘ât-ı kesîre vâki‘ olmuş idi el-hâletü hâzihî beynimize muslihûn tavassut edip da‘vâyı mezbûremden beni mezbûr Bedros ile an-inkâr otuz guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz guruşu yedinden [30b] tamamen ahz u kabz eylediğimden sonra husûs-ı mezbûra müte‘allika âmme-i da‘vâdan ben mesfûr Bedros zimmîyi ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi bedel-i sulh-ı mezbûr otuz guruşa müte‘allika âmme-i de‘âvî ve kâffe-i mütâlebât ve muhâsamâtdan beni ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 Rebî‘ülâhir sene [1]143. Şuhûdü’l-hâl: Başçukadâr Mehmed Ağa, Ahmed Çelebi b. Hasan, Abdullah b. Abdullah, Pîrî Paşa câbîsi, Mehmed b. Ali, Mehmed b. Mehmed, Ömer Ağa b. Mehmed, Abdullah Ağa b. Hasan, Ahmed Beşe b. Mehmed, Osman b. Ali, Hüseyin Beşe b. Mehmed.