Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 179 Hüküm no: 146 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Halil b. İbrahim’in Kazganî Salih Mahallesi’ndeki evini Mehmed Ağa b. Ali’ye sattığı Mübâya‘a. Mahmiye-i İstanbul’da Kazganî Salih Mahallesi sâkinlerinden el-Hâc Halil b. İbrahim nâm kimesne meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka Mehmed Ağa b. Ali mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülküme münselik olan emlâkimden olup mahalle-i mezbûrede vâki‘ bir tarafdan el-Hâc Mehmed mülkü ve iki tarafdan yine benim âhar mülküm ve bir tarafdan tarîk-i âm ile mahdûd tahtânî iki bâb oda ve bir matbah ve bir kenîf ve bir bi’r-i mâ ve bir mikdâr havlu ve bahçeyi müştemil menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Mehmed Ağa’ya beş yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr beş yüz guruşu müşteri-i merkūm Mehmed Ağa yedinden tamamen ahz u kabz eyledim. Fîmâ-ba‘d menzil-i mahdûd-ı mezkûr mezbûr Mehmed Ağa’nın mülk-i müşterâsı ve hakk-ı sırfı olup benim kat‘â alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: es-Seyyid Abdurrahman Ağa b. el-Hâc Hüseyin, Süleyman Çelebi b. Mehmed tâbi‘-i hazret-i efendi, el-Hâc Mehmed b. Mustafa, es-Seyyid Abdurrahman b. el-Hâc Mehmed, Ebûbekir Ağa b. Süleyman, Abdullah Beşe b. Hüseyin, Mehmed Çelebi b. Abdullah.