Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 179 Hüküm no: 147 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Osman Odabaşı’nın Sofular Mahallesi’ndeki evini yeniçeri ocağı kethüdası Muslu Ağa’ya sattığı Mübâya‘a-i Muslu Ağa. Mahmiye-i İstanbul’da Sofular Mahallesi sükkânından el-Hâc Osman Odabaşı b. Ebûbekir nâm kimesne meclis-i şer‘-i şerîf-i enverde hâlâ Dergâh-ı âlî -dâme mahfûfen bi’l-me‘âlî- yeniçerileri ağası olan iftihârü’l-emâcid ve’l-ekârim sa‘âdetlü semâhatlü Mehmed Ağa hazretlerinin kethüdâları umdetü’l-a‘yân sâhibü’l-kitâb Muslu Ağa b. Ömer b. Hüseyin tarafından husûs-ı âti’l-beyânı tasdîka vekîl-i müsecceli olan Ahmed Bey b. Yusuf nâm kimesne mahzarında ikrâr-ı tâm ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Mehmed Efendi mülkü ve bir tarafdan Fâtıma Hanım mülkü ve bir tarafdan Şeyh Süleyman Efendi Tekyesi ve bir tarafdan tarîk-i hâs ile mahdûd fevkānî üç bâb oda ve bir sofa ve tahtânî bir hamam ve câmekân ve köşk ve matbah ve bir kilâr ve iki ahır ve bahçeyi müştemil menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkil-i mûmâ-ileyh Muslu Ağa’ya bin sekiz yüz guruşa bey‘ ve temlîk ve teslîm ve tarîk-i hâs tarafında vâki‘ merhûm Hüseyin Efendi Vakfı’ndan olup icâreteyn-i ma‘lûmeteyn ile taht-ı tasarrufumda olan tûlen ve arzen bi-hesâb-ı terbî‘i yirmi yedi zirâ‘ vakıf arsamı dahi bâ-ma‘rifet-i mütevellî elli guruş bedel mukābelesinde ferağ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eyledikden sonra semeni mezbûr bin sekiz yüz guruş ile bedel-i merkūm elli guruş ki cem‘an bin sekiz yüz elli guruşu müvekkil-i mûmâ-ileyh Muslu Ağa yedinden tamamen ahz u kabz eyledim. Ba‘de’l-yevm menzil-i mahdûd-ı mezbûr müvekkil-i mûmâ-ileyh Muslu Ağa’nın mülk-i müşterâsı ve arsa-yı merkūme hakk-ı müveffezi olup kat‘â benim alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Rebî‘ülâhir sene [1]143. Şuhûdü’l-hâl: Ali Odabaşı b. Hüseyin 46 c[emâ‘at], İsmail Ağa b. Abdullah, Salih Odabaşı b. Hüseyin, Bayrakdâr Mustafa Beşe b. Abdullah, Mehmed Ağa b. Mehmed, mekteb hocası Mehmed Efendi, Mehmed Efendi b. Ali, el-Hâc Mustafa el-müezzin, İbrahim Odabaşı 82 c[emâ‘at], Hüseyin Odabaşı 84 c[emâ‘at], Ahmed Odabaşı 85 c[emâ‘at], İbrahim Odabaşı 82 c[emâ‘at], Hasan Odabaşı b. Hüseyin, Mehmed Beşe b. Ahmed, Molla Hüseyin b. el-Hâc Mustafa, Ali Odabaşı b. Hüseyin.