Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 180 Hüküm no: 148 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Zafiri v. Papa İstani’nin terekesi konusunda vârislerinin vekil tayini Fi’l-asl vilâyet-i Rumeli’nde Yanya kasabası mahallâtından Büyüksokak Mahallesi ahâlîsinden olup Hoton [Moton] muhâfazasında olan Abdullah Paşa hazretlerinin kasabbaşısı iken hâlik olan Zafiri v. Papa İstani v. Mihal nâm zimmînin verâseti zevce-i metrûkesi Eline bt. Yorgo v. Niko ile sulbiye kebîre kızı Vasiliki nâm Nasrâniyelere münhasıra oldukdan sonra zâtları Yani v. Filo ve Angeli v. Dimo ta‘rîfleriyle mu‘arrefe olan mezbûretân Eline ve Vasili meclis-i şer‘-i şerîf-i enverde işbu râfi‘u’r-rakīm Ananya v. Kirko muvâcehesinde her biri ikrâr ve takrîr-i kelâm edip hâlâ kasaba-i mezbûre sâkinlerinden olup mûrisimiz hâlik-i mezbûrun terekesine vâzı‘u’l-yed olan Tarandafilo v. Nani ve Tanaş ve oğlu Filo ve Kanber Ağa zevcesi Emine Hatun ve Ali Bey ve Yenişehir’de sâkin beynimizde ma‘lûm Yanaki ve sâir vâzı‘u’l-yed olan ma‘lûmü’l-esâmî ve’l-eşhâs kimesnelerden taleb ve da‘vâ ve ahz u kabz ve lede’l-iktizâ sulh ve ibrâya mezbûr Ananya’yı tarafımızdan vekîl edip ve nâib-i menâb nasb ve ta‘yîn ol dahi vekâlet-i mezbûreyi kabûl ve merâsimini edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Rebî‘ülâhir sene [1]143. Şuhûdü’l-hâl: Mehmed b. Ahmed, Hüseyin b. Abdullah, Halil b. Mustafa, Mustafa b. Ahmed, Süleyman b. Ali, Ahmed b. Hüseyin, Arakil v. Bedros.