Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 181 Hüküm no: 149 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı el-Hâc Yahya Çelebi’nin işletmek üzere Safiye bt. Zekeriya’dan aldığı parayı ödedeği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan başkâtibimiz Mevlânâ Mustafa Efendi b. el-merhûm Yunus Efendi mahmiye-i İstanbul’da Sarı Musa Mahallesi’nde sâkin Şeyhzâde el-Hâc Abdullah Efendi b. Ömer Efendi’nin menziline varıp zeyl-i rakīmde muharrerü’l-esâmî Müslimîn mahzarlarında akd-i meclis-i şer‘-i şerîf ettikde mahalle-i mezbûre kurbünde Tahtaminâre Mahallesi’nde sâkin iken bundan akdem vefât eden el-Hâc Süleyman Ağa b. İsmail b. Abdullah’ın zevce-i metrûkesi olup zâtı mezbûr el-Hâc Abdullah Efendi ve Mehmed Ağa b. el-Hâc Süleyman ta‘rîfleriyle mu‘arrefe olan Safiye bt. Zekeriya nâm hatun meclis-i ma‘kūd-ı mezkûrda bâ‘isü hâze’l-kitâb Yorgancı el-Hâc Yahya Çelebi b. Mehmed mahzarında ikrâr ve takrîr-i kelâm edip işbu sadriye kızım Emetullah nâm sagīreye babası müteveffâ-i mezbûrun terekesinden irsen intikāl eden mâlından bi’l-vesâye bi-tarîkı’l-emâne def‘ ve teslîm ol dahi yedimden ahz u kabz eylediği dokuz yüz dört guruşu üç sene üç ay i‘mâl ve sinîn-i mezkûrede i‘mâliyle hâsıl eylediği iki yüz doksan altı buçuk guruşu min-haysu’l-mecmû‘ bin yüz doksan altı buçuk guruşun altı yüz doksan altı buçuk guruşunu bundan akdem bana def‘ ve teslîm ben dahi yedinden ahz u kabz eylediğimden sonra bâkī kalan beş yüz guruşu dahi dokuz ay i‘mâl ve hâsıl eylediği otuz yedi buçuk guruş cem‘an beş yüz otuz yedi buçuk guruşu işbu meclis-i şer‘de tamamen bana def‘ ve teslîm ben dahi yedinden tamamen ahz u kabz eyledim meblağ-ı mezkûrdan mezbûr el-Hâc Yahya Çelebi yedinde ve zimmetinde bir akçe ve bir habbe bâkī kalmayıp husûs-ı mezkûra ve sâir beynimizde cereyân eden ahz u i‘tâya müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik husûs-ı mezkûru nâtık mezbûr el-Hâc Yahya Çelebi’nin yedimde olan temessükü zâyi‘ olmağla fîmâ-ba‘d zuhûr ederise mazmûnu ile amel olunmasın dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an irsâl olunan Çukadâr Mustafa b. Ahmed ve Muhzır Mehmed b. Hasan ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 29 Rebî‘ülâhir sene [1]143. Şuhûdü’l-hâl: Eş-şeyh İsmail Efendi b. eş-Şeyh Mustafa, fahrü’l-kuzât Yusuf Efendi b. Hüseyin, fahrü’l-kuzât Hasan Efendi b. Kasım, Ârif Mehmed Efendi b. Hüseyin Efendi, Veliyüddin Efendi b. Hüseyin, Mehmed Ağa b. el-Hâc Süleyman, İsmail Efendi b. Abdüllatif el-imâm, Ali Efendi b. Mahmud, Ali Çelebi b. Mahmud, es-Seyyid İbrahim b. es-Seyyid Mehmed, Hasan Ağa b. Mehmed, el-Hâc Abdullah Efendi b. Ömer Efendi, Ahmed Ağa b. Mehmed, el-Hâc Osman b. Ahmed, es-Seyyid İsmail Çelebi, es-Seyyid Mehmed Çelebi b. Mustafa, es-Seyyid İsmail Çelebi b. Ahmed.