Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 182 Hüküm no: 150 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Mehmed’in evini ve arsasını İbrahim Ağa b. Mehmed ve eşi Hadice bt. Halil’e sattığı Mahmiye-i İstanbul’da Kazganî Sadi Mahallesi’nde sâkin İbrahim Çelebi b. Mehmed nâm kimesne meclis-i şer‘-i şerîf-i enverde kendi nefsinden asıl ve zevcesi Hadice bt. Halil nâm hatun tarafından husûs-ı âti’z-zikri tasdîka vekîl-i sâbitü’l-vekâlesi olan bâ‘isü’l-kitâb İbrahim Ağa b. Mehmed mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahî[hi]mde münselik olan emlâkimden olup mahalle-i mezbûrede vâki‘ bir tarafdan Mustafa Ağa menzili ve bir tarafdan Sahaf es-Seyyid Hüseyin Çelebi menzili ve bir tarafdan Fâtıma Hatun menzili ve bir tarafdan tarîk-i âm ile mahdûd hâriciyye ve dâhiliyesi fevkānî üç bâb oda ve bir sofa ve dehlîz ve tahtânî bir bâb oda ve matbah ve kenîf ve bir bi’r-i mâ ve bir mikdâr bahçe ve havlu ve mukaddemâ İskemleci Mustafa Ağa nâm kimesneden semen-i ma‘lûm ve medfû‘a iştirâ ve kabz eylediğim kırk altı zirâ‘ hâliye arsayı müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr İbrahim Ağa ve zevcesi merkūme Hadice Hatun’a sekiz yüz yetmiş guruşa münâsafaten bey‘ ve temlîk ve teslîm eylediğimde onlar dahi minvâl-ı meşrûh üzere ale’l-iştirâki’s-seviyy münâsafaten iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr sekiz yüz yetmiş guruşu mezbûr İbrahim Ağa ile zevcesi mezbûre Hadice Hatun yedlerinden tamamen ahz u kabz eyledim. Fîmâ-ba‘d menzil-i mahdûd-ı mezkûr mezbûr İbrahim Ağa ile zevcesi merkūme Hadice Hatun’un ber-vech-i muharrer münâsafaten mülk-i müşterâ ve hakk-ı sırfları olup benim kat‘â alâka ve medhalim kalmamışdır. Keyfemâ-yeşâ’ân ve yahtârân mutasarrıflar olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Rebî‘ülâhir sene [1]143. Şuhûdü’l-hâl: Yetmiş bir cemâ‘atden Hâfız Molla Mehmed, altmış bir cemâ‘atden Ese Beşe, Yanyalı Mustafa Mîrâlây, İsmail Ağa teberdâr-ı sâbık, yirmi iki cemâ‘atden Musa Odabaşı, Mustafa Beşe elli dört bölük, Gürci Mehmed b. Abdullah, fazîletli Abdullah Efendi.