Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 183 Hüküm no: 151 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in Karabaş Mahallesi’ndeki evini Yeniçeriler kalemi kisedarı Mehmed Efendi’ye sattığı Mübâya‘a. Mahmiye-i İstanbul’da Yenibahçe kurbünde Karabaş Mahallesi sâkinelerinden olup zâtı Musa Efendi b. Mehmed ve Molla Ebûbekir b. Ömer ta‘rîfleriyle mu‘arrefe olan Âişe bt. Mehmed nâm hatun meclis-i şer‘-i şerîf-i enverde Dergâh-ı âlî -dâme mahfûfen bi’l-me‘âlî- yeniçerileri kalemi kîsedârı umdetü erbâbi’t-tahrîr ve’l-kalem sâhibü’l-kitâb Mehmed Efendi b. Mustafa b. Ömer nâm kimesne tarafından husûs-ı âti’l-beyânı tasdîka vekîl olan Mustafa Çelebi b. Mehmed mahzarında ikrâr ve takrîr-i kelâm edip arsasının senede merhûm Sultan Bayezid-i Veli Vakfı’na yüz yirmi akçe mukāta‘ası ve üzerinde olan ebniye-i memlûkesi akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Fâtıma bt. Abdullah nâm hatun menzili ve bir tarafdan Berber es-Seyyid Ahmed Çelebi menzili ve bir tarafdan müftî kethüdâsı ( ) Efendi bostanı ve bir tarafdan tarîk-i âm ile mahdûd hâriciyyesinde fevkānî iki bâb oda ve ahır ve bir bi’r-i mâ ve bir kenîf ve dâhiliyesinde fevkānî iki bâb oda ve bir sofa ve bir matbah ve bir kenîf ve bir mikdâr bahçeyi müştemil menzilimin ebniye-i memlûkesini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkil-i mezbûr Mehmed Efendi’ye üç yüz on beş guruşa bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferağ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eyledikden sonra semeni olan meblağ-ı mezbûr üç yüz on beş guruşu müvekkil-i mezbûr Mehmed Efendi yedinden tamamen ahz u kabz eyledim ba‘de’l-yevm menzil-i mahdûd-ı mezkûrun ebniye-i memlûkesi müvekkil-i merkūm Mehmed Efendi’nin mülk-i müşterâsı ve arsası dahi dâhil-i havza-i tasarrufu olup kat‘â benim alâka ve medhalim kalmamışdır. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: Solak İsmail Bey b. ( ), Kilârî Abdullah Beşe, Abdi Odabaşı 89 c[emâ‘at], Sarrac Mehmed Çelebi 89 c[emâ‘at], İsmail Beşe b. Mehmed, Süleyman Beşe b. Ali, Musa Efendi b. Mehmed, Molla Ebûbekir b. Ömer, Sarrac Mustafa muhzır.