Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 184 Hüküm no: 152 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdünnebi Çelebi b. Mustafa’nın Kasımpaşa’da Yeldeğirmeni Mahallesi’ndeki evini es-Seyyid Abdullah Odabaşı’ya istiğlal yoluyla sattığı İstiğlâl. Mahrûse-i Galata’ya tâbi‘ kasaba-i Kasımpaşa’da Yeldeğirmeni Mahallesi’nde sâkin Abdünnebi Çelebi b. Mustafa nâm kimesne meclis-i şer‘-i şerîf-i enverde Dergâh-ı âlî -dâme mahfûfen bi’l-me‘âlî- yeniçerilerinin yüz birinci cemâ‘atine mahsûs oda neferâtının mühimmâtına mevkūfe nukūda bi’l-fi‘il mütevellî olan bâ‘isü hâze’l-kitâb es-Seyyid Abdullah Odabaşı mahzarında ikrâr-ı tâm ve takrîr-i kelâm edip bi’l-irsi’ş-şer‘î yedimde mülk ve hakkım olup mahalle-i mezbûrede vâki‘ bir tarafdan Tersâne-i âmire ve bir tarafdan Kazzâz Abdullah Çelebi menzili ve bir tarafdan Emine Hatun menzili ve bir tarafdan tarîk-i âm ile mahdûd hâriciyye ve dâhiliyede büyût-ı adîdeyi müştemil mülk menzilimi bi-cümleti’t-tevâbi‘ ve’l-levâhık mütevellî-i mezbûr es-Seyyid Abdullah’a iki yüz guruşa bi-tarîkı’l-istiğlâl bey‘ ve teslîm eylediğimde ol dahi mâl-ı mevkūf-ı mezbûr ile bi’t-tevliye iştirâ ve kabûl ve teslîm-i semen eyledikden sonra yine mütevellî-i mezbûr es-Seyyid Abdullah menzil-i mezkûru ba‘de’t-tahliyyeti’ş-şer‘iyye ve’t-takābuzi’l-mer‘î târih-i kitâbdan bir sene tamamına değin otuz guruşa bana îcâr ve teslîm ben dahi ber-vech-i muharrer istîcâr ve kabûl ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: Hüseyin Odabaşı b. Mehmed, Ali Beşe b. Mustafa, İbrahim Beşe b. Mustafa, Osman Çelebi b. Mehmed, es-Seyyid Mustafa Çelebi [b.] Mehmed, es-Seyyid Mustafa Efendi b. Bostanzâde, Mehmed Efendi b. İbrahim, Hüseyin Efendi b. Mehmed, Mehmed Efendi b. Mehmed, Mehmed Çelebi b. Süleyman.