Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 188 Hüküm no: 158 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Abdullah’ın Hoca Üveys Mahallesi’ndeki evde olan hissesini Sâliha bt. Mehmed’e sattığı Mübâya‘a. Mahmiye-i İstanbul’da Hoca Üveys Mahallesi sâkinelerinden Hanife bt. Abdullah nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân Veli b. Ahmed ve es-Seyyid Hüseyin b. Ahmed nâm kimesneler şehâdetleriyle sâbit olan Süleyman b. Ali nâm kimesne meclis-i şer‘-i şerîf-i enverde işbu bâ‘isetü’l-vesîka Sâliha bt. Mehmed nâm hatun mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre ile mezbûre Sâliha Hatun’un ale’l-iştirâk yedlerinde mülk ve hakları olup mahalle-i mezbûrede vâki‘ bir tarafdan Hırka-i şerîf şeyhi menzili ve bir tarafdan dede Efendi menzili ve bir tarafdan Mirza Çelebi menzili ve bir tarafdan tarîk-i âm ile mahdûd fevkānî bir bâb oda ve sofa ve tahtânî bir bâb oda ve kenîf ve havluyu müştemil mülk menzilin nısf-ı şâyi‘-i âharını dahi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile otuz guruşa mezbûre Sâliha Hatun’a bey‘ ve temlîk eylediğinde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr otuz guruşu müvekkilem mezbûre Hanife Hatun mezbûre Sâliha Hatun yedinden tamamen ahz u kabz eyledi. Fîmâ-ba‘d menzil-i mahdûd-ı mezkûrun mecmû‘u mezbûre Sâliha Hatun’un mülk-i müşterâsı ve hakk-ı sırfı olup müvekkilem mezbûre Hanife Hatun’un kat‘â alâka ve medhali kalmamışdır. Keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 4 Cumâdelûlâ sene [1]143. Şuhûdü’l-hâl: Tezkireci İbrahim Ağa, Mehmed Ağa b. Süleyman, Çolak Veli Beşe, Mustafa Çelebi, es-Seyyid Hüseyin b. Ahmed, Ahmed Beşe b. Osman, es-Seyyid Mehmed b. Ahmed, Veli Dede b. Ahmed, es-Seyyid Hüseyin b. Ahmed.