Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 189 Hüküm no: 159 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Hüseyin ile Yusuf Çelebi b. Cafer, Osman Çelebi b. Ramazan ve Ahmed Efendi’nin aralarındaki davada sulh oldukları Sulh. Mahmiye-i İstanbul’da Tavukpazarı kurbünde vâki‘ el-Hâc Selim Hânı demekle ma‘rûf hânda sâkin Osman b. Hüseyin nâm kimesne meclis-i şer‘-i şerîf-i enverde işbu hâfızü’l-kitâb Yusuf Çelebi b. Ca‘fer nâm kimesne mahzarında ikrâr ve takrîr-i kelâm edip mezbûr Yusuf Çelebi ile gāib ani’l-meclis Osman Çelebi b. Ramazan nâm kimesne târih-i kitâbdan dört sene mukaddem Ahmed Efendi nâm kimesnenin hizmetinde iken mezbûrân Yusuf Çelebi ve gāib ani’l-meclis Osman Çelebi iki yüz otuz guruş kıymetli bir re’s gulâmımı yüz seksen guruşa yedimden cebren ahz u kabz eylediklerinden mâ‘adâ başıma yumruk ile darb-ı şedîd ile darb etmeleriyle ol darbdan nâşî sol gözümün ziyâsı bi’l-külliye zâil olmağın mûceb-i şer‘îsini mezbûrândan taleb ve da‘vâ eylediğimde onlar dahi bi’l-külliye inkâr etmeleriyle beynimizde münâza‘ât-ı kesîre ve muhâsamât-ı ekîde cereyân etmişidi. El-hâletü hâzihî beynimize muslihûn tavassut edip da‘vâ-yı mezkûremden beni mezbûrân ile an-inkâr seksen guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezkûr seksen guruşu mezbûrân yedlerinden tamamen ahz u kabz eyledim ba‘de’l-yevm husûs-ı mezbûra ve târih-i kitâba gelince âmme-i [33b] de‘âvî ve kâffe-i mütâlebâtdan mezbûrân Yusuf Çelebi ve gāib-i mezbûr Osman Çelebi ile mezbûr Ahmed Efendi’nin zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Cumâdelûlâ sene [1]143. Şuhûdü’l-hâl: Fahrü’l-akrân Serdâr Mehmed Ağa, Çukacı Mustafa Ağa, Abdullah Ağa Üsküdarî, Kādı Ali Efendi, Abdurrahman Ağa b. Abdullah, Hâfız Ya‘kub Efendi b. el-Hâc Salih, Abdülfettâh Çelebi tâbi‘-i şeyhülislâm, el-Hâc Abdullah b. Mehmed, Ömer Bey, Mehmed Çelebi b. ( ), Hüseyin b. İsmail, Mehmed Halîfe, Küçük Mehmed, Hoca Mustafa Efendi, Hâfız Mustafa Efendi imâm-ı Tophane, el-Hâc Musa Ağa b. el-Hâc Mustafa Ağa.