Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 189 Hüküm no: 160 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ali b. Mehmed’in Ahmed Çelebi b. Ali üzerine açtığı davada haksız olduğu Bâ-imzâ-i hazret-i efendi. Mahmiye-i İstanbul’da Molla Kestel Mahallesi ahâlîsinden el-Hâc Ali b. Mehmed nâm kimesne meclis-i şer‘-i hatîr-i lâzımü’t-tevkīrde bâ‘isü hâze’l-kitâb Ahmed Çelebi b. Ali nâm kimesne mahzarında üzerine da‘vâ ve takrîr-i kelâm edip Mahmiye-i mezbûrede Emin Nureddin Mahallesi’nde vâki‘ gallesi mahalle-i mezbûrede imâm olanlara meşrûta lede’l-ahâlî ve’l-cîrân ma‘lûmü’l-hudûd ve’l-müştemilât vakıf menzilin mutasarrıfesi olup bundan akdem vefât eden Meryem nâm hatun menzil-i mezbûrun nısf-ı şâyi‘ini bundan akdem sıhhatinde yüz guruş bedel-i makbûz mukābelesinde işbu hâzır bi’l-meclis mütevellî-i vakf es-Seyyid Ahmed Efendi izin ve ma‘rifetiyle bana ferağ ve kasr-ı yed etmişiken bi’l-cümle menzil-i mezbûru mezbûr Ahmed bi-gayr-ı hakkın tasarruf eder deyü da‘vâ eyledikde mezbûr Ahmed dahi cevâbında mezbûre Meryem Hatun müdde‘î-i mezbûr Ali ile bin yüz otuz sekiz senesinde İstanbul kādısı olan imâm-ı şehriyârî Abdurrahman Efendi huzûrunda nısf-ı menzil-i mezbûru vefâen ferağ ve kasr-ı yed etmişidim deyü da‘vâ ve ber-vech-i muharrer menzil-i mezbûrun nısfını vefâ tarîkı ile ferağ ve kasr-ı yed eylediği nümâyân oldukdan sonra bedel-i mezbûr yüz guruşu müdde‘î-i mezbûr Ali’ye ba‘de’t-teslîm mezbûre Meryem menzil-i mezbûru târih-i kitâbdan dört sene mukaddem beş yüz guruş bedel-i makbûz mukābelesinde bâ-ma‘rifet-i mütevellî bana ferağ ve kasr-ı yed eylemişidi deyü mazmûnu min-külli’l-vücûh takrîrine mutâbık kādı-ı mûmâ-ileyh Abdurrahman Efendi’nin hatmiyle mahtûm bir kıt‘a i‘lâm ibrâz eylediğinde müdde‘î-i mezbûr mazmûn-ı i‘lâm-ı mezbûru ikrâr u i‘tirâf etmeğin mûcebince müdde‘î-i mezbûr el-Hâc Ali bî-vech mu‘ârazadan men‘-birle mâ-vaka‘a bi’t-taleb ketb olundu. Fî 12 Rebî‘ülâhir sene [1]143. Şuhûdü’l-hâl: Mehmed Çelebi b. Abdullah, Ahmed Çelebi b. Hasan, İbrahim Çelebi b. Mustafa.