Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 191 Hüküm no: 162 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakfa ait evin İmam Mustafa Efendi b. Hasan’a tevcih olunduğu Tevcîh-i menzil. Sâhibât-ı hayrâtdan Hadice nâm sâhibetü’l-hayrın süknâsı ulemâ ve sulehâdan bir recül-i sâlihe meşrûta vakfı olup Mahmiye-i İstanbul’da Kazasker Mehmedefendi Mahallesi’nde vâki‘ bir tarafdan Kethüdâyeri Mustafa Ağa menzili ve bir tarafdan Ramipaşazâde Abdurrahman Bey menzili ve bir tarafdan Matarazâde mülkü ve bir tarafdan tarîk-i âm ile mahdûd ve ma‘lûmü’l-müştemilât vakıf menzile ber-mûceb-i şart-ı vâkıfı tevcîh-i hâkimü’ş-şer‘le mutasarrıf olan ( ) Abdurrahman bilâ-veled vefât etmekle süknâ-yı menzil-i mezbûr mahlûl olmağın hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri süknâ-yı menzil-i mezbûru ber-mûceb-i şart-ı vâkıfe ulemâ ve sulehâdan olup süknâya muhtâc olan bâ‘isetü’l-vesîka İmâm Mustafa Efendi b. Hasan’a tevcîh buyurup tasarrufuna izin verilmeğin mâ-hüve’l-vâki‘ bi’t-taleb ketb olundu. Fî 6 Cumâdelûlâ sene [1]143. Şuhûdü’l-hâl: Musa Bey b. Mehmed, Mehmed Çelebi b. Abdullah, Osman Bey b. Veli, Câbî İbrahim Çelebi b. Abdullah.