Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 192 Hüküm no: 163 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçerilerden Hasan Beşe ile Ahmed Efendi’nin aralarındaki alacak davasında sulh oldukları Dergâh-ı âlî -dâme mahfûfen bi’l-me‘âlî- yeniçerilerinin yetmiş dokuzuncu cemâ‘atine mahsûs oda neferâtından Hasan Beşe b. Osman nâm kimesne meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka Ahmed Efendi b. Ömer Efendi mahzarında ikrâr-ı tâm ve takrîr-i kelâm edip mezbûr Ahmed Efendi’den bir sene mukaddem baban mezbûr Ömer Efendi mahrûse-i Edirne’de hâkimü’ş-şer‘ olmağla târih-i mezbûrda sen buğday kaçırdın deyü benden bi-gayr-ı hakkın üç yüz guruşumu ahz eyledi deyü da‘vâ sadedinde olduğunda mezbûr Ahmed Efendi dahi inkâr etmeğin beynimizde münâza‘ât-ı kesîre cereyân etmişidi. El-hâletü hâzihî beynimize muslihûn tavassut edip da‘vâ-yı mezbûremden beni mezbûr Ahmed Efendi ile an-inkâr seksen guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr seksen guruşu mezbûr Ahmed Efendi yedinden tamamen ahz u kabz eylediğimden sonra meblağ-ı mezbûrun mâ‘adâsına müte‘allika âmme-i da‘vâdan ben mezbûr Ahmed Efendi’nin zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi bedel-i sulh olmak üzere medfû‘u olan meblağ-ı mezbûr seksen guruşa müte‘allika âmme-i da‘vâdan benim zimmetimi ibrâ-i âm ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelûlâ sene [1]143. Şuhûdü’l-hâl: Bayrakdâr Mehmed Beşe b. Ömer, Osman Haseki b. Ali, Mehmed Beşe b. Osman, Mehmed Odabaşı b. Hüseyin, Hüseyin Beşe b. Ali.