.:: İstanbul Kadı Sicilleri ::.


Bab Mahkemesi 150 Numaralı Sicil (H. 1143-1144 / M. 1730-1732)
cilt: 65, sayfa: 193
Hüküm no: 165
Orijinal metin no: [34a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ali Ağa b. Abdullah ile Osman, Ömer, Halil ve İsmihan’ın aralarındaki mahzen inşası davasında sulh olduğu

Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i enverden irsâl olunan Mevlânâ Müezzinzâde Mehmed Efendi b. İbrahim Efendi mahmiye-i İstanbul’da İmâm Ali Mahallesi’nde sâkin bâ‘isü hâzihi’l-vesîka Ali Ağa b. Abdullah’ın menziline varıp zeyl-i vesîkada mastûrü’l-esâmî Müslimîn mahzarlarında akd-i meclis-i şer‘-i kavîm ettikde mezbûr Ali Ağa meclis-i ma‘kūd-ı mezkûrda câr-ı mülâsıkı Osman ve Ömer b. Hüseyin nâm kimesneler ile Halil b. Mehmed ve mezbûr Halil’in zevcesi olup zâtı ta‘rîf-i şer‘î ile mu‘arrefe olan İsmihan bt. Halil mahzarlarında takrîr-i kelâm ve bast-ı merâm edip mezbûr Osman ve Ömer ve Halil ve İsmihan’dan her biri sen târih-i kitâbdan dört buçuk ay mukaddem menzilimiz duvarı dibinde mahzen hafr ettirip menzilimizin esâs ve binâsına vehn getirdiğinden nâşî menzillerimiz münhedim oldu deyü benden şer‘an lâzım gelen zararlarını tazmîn murâd eylediklerinde ben dahi menzil-i mezkûrumda ber-vech-i muharrer mahzen binâ eylediğimi ikrâr lâkin mezbûrûnun menzillerinin esâs ve binâsına vehn getirip ol vechile te‘addî ettiğimden nâşî üzerime damân terettübünü inkâr ettiğimde beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûrelerinden mezbûr Halil ve zevcesi İsmihan’ı [34b] otuz guruş üzerine ve mezbûrân Osman ve Ömer’i on guruş üzerine inşâ-i akd-i sulh eylediklerinde ben dahi sulh-ı mezbûru ba‘de’l-kabûl bedel-i sulh-ı mezbûru merkūmûndan her birine bi-kadri’l-hısas tamamen def‘ ve teslîm ve onlar dahi ber-vech-i muharrer yedimden ahz u kabz eylediklerinden husûs-ı mezkûra müte‘allika âmme-i da‘vâdan her biri benim zimmetimi ibrâ ve iskāt eyledi dedikde mezbûrûndan her biri dahi merkūm Ali Ağa’yı kelimât-ı meşrûhasında vicâhen ve şifâhen tasdîk ve tahkīk etmeğin vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr Hüseyin b. Ahmed ve Muhzır Mustafa b. Abdullah ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu.

Fî 4 Cumâdelûlâ sene [1]143.

Şuhûdü’l-hâl: Hüseyin Halîfe b. Ömer, el-Hâc Mustafa b. Abdullah, Baba Veli b. Receb, Hüseyin b. Mehmed, Ahmed Ağa b. Mehmed, el-Hâc Ali b. Mehmed, Mustafa Ağa b. Mehmed, Veli Ağa b. Mustafa, Mehmed b. Mustafa, İsmail b. Abdullah, Ahmed Çavuş b. Hasan.