Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 194 Hüküm no: 166 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mehmed’in gelirini evladına vakfettiği arsanın yapılan keşif sonucu hak sahiplerine taksim edildiği Husûs-ı âti’l-beyânın mahallinde keşif ve tahrîr ve taksîmi için bi’l-iltimâs kıbel-i şer‘den irsâl olunan Mevlânâ Bostanzâde es-Seyyid Mustafa Efendi hâssa mi‘mârlarından Ali Halîfe b. Ahmed ve Süleyman Halîfe b. Abdi ile mahmiye-i İstanbul’da Habbâz Ali Mahallesi’nde vâki‘ merhûme Ümmügülsüm bt. Mehmed nâm sâhibetü’l-hayrın süknâ ve gallesi neslen ba‘de nesl evlâdına ve evlâd-ı evlâd-ı evlâdına ve ba‘de’l-inkırâz gallesi mahalle-i merkūmede imâm olanlara meşrûta olduğu vakfiye-i ma‘mûlün-bihâsı mantûkunca lede’ş-şer‘ mütebeyyin ve zâhir olan bir tarafdan Ebru nâm sâhibü’l-hayrın vakfından olup Ömer Ağa tasarrufunda olan arsa-yı hâliye ve bir tarafdan Haremeyn-i şerîfeyn Vakfı’ndan olup yine merkūm Ömer Ağa tasarrufunda olan arsa-yı hâliye ve bir tarafdan yine merkūm Ömer Ağa’nın mülk menzil arsası ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i nebevî ettikde menzil-i mezkûra ber-mûceb-i şart-ı vâkıfe derecede müsâvîler olmağla evlâdiyet ve meşrûtiyyet üzere mutasarrıfe olan Sâliha bt. Receb ve Âişe bt. Ebûbekir nâm hatunlar asâleten ve Ümmühani bt. Halil b. Abdullah tarafından husûs-ı âti’l-beyâna vekîl olduğu İbrahim b. Ahmed ve Osman b. Ali şehâdetleriyle sâbit olan Mehmed b. Hüseyin vekâleten meclis-i ma‘kūd-ı mezbûrda vakf-ı merkūma kıbel-i şer‘den mütevellî nasb olunan mahalle-i mezbûre imâmı Mustafa Efendi b. Mehmed hâzır olduğu hâlde her biri takrîr-i kelâm ve bast-ı merâm edip menzil-i mahdûd-ı mezbûr bundan akdem muhterik ve arsa-yı sırfa kalıp ta‘mîr ve meremmete mevkūfen cânib-i vakfda nesne olmamağla ta‘mîr ve meremmet şer‘an men-lehü’s-süknâ üzerine lâzım gelmeğin re’y-i mütevellî ile arsa-yı mezbûre mesâha ve takvîm ve her birimizin hisseleri ifrâz ve alâmât-ı fâsıla vaz‘ıyla mu‘ayyen ve mümtâz olundukdan sonra her birimiz hâlimize göre binâ etmek matlûbumuz dediklerinde arsa-yı merkūmeyi mi‘mârân-ı mezbûrân mesâha eylediklerinde tûlen yirmi yedi zirâ‘ altı parmak ve arzen yirmi bir zirâ‘ dokuz parmak bi-hesâb-ı terbî‘i beş yüz doksan bir zirâ‘ arsadan her birine yüz doksan yedi zirâ‘ dörder parmak arsa isâbet etmeğin merkūm Ömer Ağa’nın mülk menzil arsası tarafında vâki‘ yüz doksan yedi zirâ‘ dört parmak arsa bi’t-terâzî mezbûre Sâliha Hatun’a ve Ebru Vakfı tarafında vâki‘ yüz doksan yedi zirâ‘ dört parmak arsa bi’t-terâzî müvekkile-i mezbûre Ümmühani Hatun’a ve Haremeyn-i şerîfeyn ile tarîk-i âm tarafında vâki‘ yüz doksan yedi zirâ‘ dört parmak arsa bi’t-terâzî merkūme Âişe Hatun’a ta‘yîn ve tahsîs ve alâmât-ı fâsıla vaz‘ıyla birbirinden mümtâz ve her biri mütevellî-i mezbûr izniyle hisse-i müfrezelerini bi’l-asâle ve bi’l-vekâle kabz ve kabûl eylediklerini mevlânâ-yı mezbûr mahallinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 15 Rebî‘ülâhir sene [1]143. Şuhûdü’l-hâl: Umdetü’l-müderrisîni’l-kirâm Nâzırzâde Mehmed Efendi b. İsmail Efendi, Ömer Ağa b. Selim, Mehmed Efendi b. İbrahim, Mehmed Çelebi b. Hüseyin, İbrahim Çelebi b. Ahmed, Abdullah Çelebi b. Abdülkerim, Osman Çelebi b. Ali, Mücellid İbrahim Çelebi b. Receb, Abdurrahman Çelebi b. Hasan, Mehmed Çelebi b. Ahmed.