Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 195 Hüküm no: 167 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mustafa ve oğlu Numan ile Kara İbrahim’in kuloğlanları içinde fitne çıkardıkları Kuloğlanlarının. Mahmiye-i İstanbul’da Keçeci Pîrî Mahallesi ahâlîsinden Mustafa b. Mustafa ve kebîr oğlu Numan ve Kara İbrahim nâm kimesneler meclis-i şer‘-i hatîr-i lâzımü’t-tevkīrde hâlâ İstanbul ihtisâb mukāta‘asının bâ-berât-ı âlîşân birbirlerine kefâlet ile ta‘yîn olunan on beş nefer kuloğlanlarından hâlâ bâ-berât-ı âlîşân terâzûbâşıları bâ‘isü hâzihi’l-vesîka el-Hâc Mustafa ve karındaşı Hasan nâm kimesneler mahzarlarında biz kadîmden berü bâ-berât-ı âlîşân on beş nefer kuloğlanlarından olup kat‘â birimize dahl ve ta‘arruz olunmak îcâb etmez iken mezbûrân el-Hâc Mustafa ve Hasan bizi hizmet-i mezbûrede istihdâm etmeyip bi-gayr-ı vechin ihrâc ve gadretmişlerdir suâl olunup işbu yedimizde olan atîk berâtlarımız mantûkunca hizmet-i mezbûrede istihdâm etmek üzere tenbîh olunmak murâdımızdır deyü da‘vâ ettiklerinde gıbbe’s-suâl mezbûrân el-Hâc Mustafa ve Hasan cevâblarında fi’l-hakīka müdde‘ûn-ı mezbûrûn Mustafa ve Numan ve Kara İbrahim ber-vech-i muharrer bundan akdem bâ-berât-ı âlîşân on beş nefer kuloğlanlarından olduklarını ikrâr lâkin mezbûrûn Mustafa ve oğlu Numan ve Kara İbrahim kendi hâllerinde olmayıp kuloğlanlıklarına kanâ‘at etmeyip birbiriyle yek-dil ve yek-cihet ve kuloğlanları beyninde ve ihtisâb mukāta‘ası umûrunda dâimâ hîle ve hud‘a ve îkāz-ı fitne ile me’lûf-ı müfsid olduklarından nâşî mezbûrûndan her birinin kuloğlanlıkdan yerleri bâ-fermân-ı âlî ref‘ ve âhara tevcîh ve mukāta‘a-i mezbûre umûrundan ihrâc olunup diyâr-ı âhara nefy olmuşlardır deyü mazmûnu min-külli’l-vücûh takrîrlerine mutâbık fermân âlî ile mu‘anven bir kıt‘a telhîs ve bir kıt‘a derkenâr ibrâz ettiklerinde mezbûrûn Mustafa ve Numan ve Kara İbrahim istintak olunduklarında fi’l-hakīka kaziyye vech-i meşrûh üzere idiğini her biri ikrâr u i‘tirâf etmeleriyle ber-mûceb-i emr-i âlî mezbûrûn Mustafa ve Numan ve Kara İbrahim min-ba‘d mezbûrûn on beş nefer kuloğlanlarına ve mukāta‘a-i mezbûre umûruna kat‘â müdâhale ve mu‘âraza etmemek üzere tenbîh-i ekîd-birle mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâlis min-Cumâdelûlâ sene [1]143. Şuhûdü’l-hâl: Mehmed Ağa b. el-Hâc Hüseyin pazarbaşı, Mehmed Ağa b. Mehmed kethüdâ-yı muhzırân, Mehmed Çelebi b. Abdullah, diğer Mehmed Çelebi b. Abdullah, diğer Mehmed Çelebi b. Ahmed, İbrahim b. Mustafa, Salih b. Süleyman, Ahmed b. el-Hâc Hasan, Abdullah b. Mustafa, Eyüb b. Mehmed, Ahmed b. Abdullah, Hüseyin b. Abdullah, Ali Çelebi b. Abdullah, Mehmed Ağa b. Hacı Osman.