Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 196 Hüküm no: 168 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hüseyin Ağa’nın Draç kasabası ahalisiyle vergiden dolayı aralarında olan davada sulh oldukları Mahmiye-i İstanbul’da Ayasofya-i kebîr Câmi‘-i şerîfi kurbünde Acemağa Mahallesi ahâlîsinden olup vilâyet-i Rumeli’nde vâki‘ Draca [Draç] kasabasında ber-vech-i mâlikâne mutasarrıf olan işbu bâ‘isü’l-kitâb el-Hâc Hüseyin Ağa b. el-Hâc Mehmed nâm kimesne meclis-i şer‘-i şerîf-i enverde kasaba-i mezbûre <> re‘âyâsından Pavli v. Piyo ve Dragan v. Nikola ve İstimat v. Petro ve Dimitri v. İstefan ve Dimitri v. Velço ve Yuvan v. Dragan ve Peyço v. Todori ve Todori v. Kosta ve sâirleri mahzarında takrîr-i kelâm ve bast-ı merâm edip mesfûrûn re‘âyâ zimmetlerinde ber-mûceb-i sûret-i defter-i hâkānî târih-i kitâba gelince üç senede müctemi‘ rüsûm-ı ra‘iyyetlerin taleb ve da‘vâ eylediğimde onlar dahi sinîn-i mezkûrede ber-mûceb-i sûret-i defter-i hâkānî rüsûmumuzdan ziyâde akçemiz ahz u kabz etmişidin deyü benden taleb ve da‘vâ sadedinde olmalarıyla beynimizde münâza‘ât-ı kesîre vâki‘ olmuşidi. El-hâletü hâzihî beynimize muslihûn tavassut etmekle ben da‘vâ-yı mezkûremden fâriğ olup husûs-ı mezkûra müte‘allika âmme-i da‘vâdan mesfûrûn re‘âyânın zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde onlar dahi kezâlik târih-i kitâba gelince ber-vech-i muharrer husûs-ı mezkûra müte‘allika âmme-i da‘vâdan benim zimmetimi ibrâ-i âmm-ı râfi‘u’l-hısâm ile ibrâ ve iskāt eylediklerinde min-ba‘d mesfûrûn ile vechen mine’l-vücûh ve sebeben mine’l-esbâb kat‘â da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 Cumâdelûlâ sene [1]143. Şuhûdü’l-hâl: El-hâc Mustafa Ağa b. Mehmed ve Mustafa b. Hasan ve Mehmed b. Ömer, Mehmed b. Abdullah.