Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 196 Hüküm no: 169 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başyazıcı Üsküdarî Mustafa Efendi’nin Ördekkasap Mahallesi’ndeki evini Salih Ağa b. Ahmed’e hibe ettiği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ Bostanzâde es-Seyyid Mustafa Efendi Mahmiye-i İstanbul’da İskenderpaşa Mahallesi’nde sâbıkā fırın ağası Salih Ağa b. Ahmed’in menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i kavîm ettikde Mahmiye-i mezbûrede Ördekkasab Mahallesi’nde sâkin sâbıkā Başyazıcı Üsküdarî Mustafa Efendi b. Mehmed b. Abdullah tarafından husûs-ı âti’z-zikri ikrâra vekîl olduğu el-Hâc İbrahim b. Abdullah ve Hüseyin Usta b. Süleyman şehâdetleriyle sâbit olan el-Hâc Mehmed Efendi b. Ahmed nâm kimesne meclis-i ma‘kūd-ı mezkûrda müvekkil-i mezbûrun li-üm er karındaşı işbu râfi‘u’l-kitâb merkūm Salih Ağa mahzarında bi’l-vekâle ikrâr ve takrîr-i kelâm edip müvekkilim-i mezbûr akd-i âtî sudûruna değin yedinde mülk ve hakkı olup zikrolunan mahallede vâki‘ bir tarafdan Başyazıcı Giridli Ali Efendi menzili ve bir tarafdan Ahmed Efendi veresesi menzili ve bir tarafdan Çelebi Mehmed Paşa kerîmesi menzili ve bir tarafdan tarîk-i âm ile mahdûd dâhiliyesinde fevkānî iki bâb oda ve bir sofa ve kenîf ve dehlîz ve tahtânî bir matbah ve bir kilâr ve bi’r-i mâ ve kenîf ve bahçe ve hâriciyyesinde fevkānî iki bâb oda ve dehlîz ve tahtânî bir ahır ve kenîf ve bir mikdâr havlu ve etrâf selâseden taş duvarı müştemil işbu akd-i meclis-i şer‘ olunan mülk menzili fâriğân ani’ş-şevâgil târih-i kitâbdan bir gün mukaddem merkūm Salih Ağa’ya hibe-i sahîh-i şer‘iyye ile hibe ve temlîk ve teslîm eylediğinde ol dahi meclis-i hibede ittihâb ve temellük ve tesellüm ve kabûl eyledi ba‘de’l-yevm menzil-i mahdûd-ı mezbûr merkūm Salih Ağa’nın mülk-i mevhûbu olup müvekkilim-i mezbûrun kat‘â alâka ve medhali kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 7 Cumâdelûlâ sene [1]143. Şuhûdü’l-hâl: Hüseyin Odabaşı b. Mahmud 10 c[emâ‘at], Mehmed Çavuş b. Ahmed, İbrahim Beşe b. Ahmed, Mehmed Beşe b. Ömer, Derviş Mehmed Ağa b. Mustafa, Bosnevî Ahmed b. Süleyman, eş-Şeyh Abdülhalim Efendi, Hüseyin Çelebi b. Abdurrahman, Ördekkasab imâmı Mehmed Efendi b. Mehmed, Molla Mustafa b. Ahmed, Mehmed Beşe b. Ahmed, Molla Mehmed b. Ahmed, İsmail Ağa b. Abdullah, Salih Ağa kethüdâyeri.