Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 197 Hüküm no: 170 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ebûbekir Ağa’nın Maktûl İbrahim Paşa’nın silahşoru olup öldürülen Arab el-Hâc Mustafa Ağa’da kalan alacağını şahitlerle ispat ettiği Bin yüz kırk iki senesinde vilâyet-i Anadolu’da eyâlet-i Karaman avârızı cem‘ine memûr olup Mahmiye-i İstanbul’da müsâfiren sâkin fahrü’l-a‘yân bâ‘isü hâze’l-kitâb el-Hâc Ebûbekir Ağa b. Mustafa meclis-i şer‘-i şerîf-i enverde vezîriazam-ı sâbık Maktûl İbrahim Paşa’nın hayâtında silâhşoru iken bundan akdem katîlen vefât eden Arab el-Hâc Mustafa Ağa b. Abdullah b. Abdurrahman’ın verâseti zevce-i metrûkeleri olup mahmiye-i mezbûrede sâkine Âişe bt. Abdullah atîka-i merhûm Çorlulu Mehmed Paşa’ya ve zikrolunan Anadolu’da medîne-i Adana’da sâkine Âişe bt. ( ) ve Hadice bt. ( ) ve Elif bt. ( ) nâm hatunlara ve sulbî sagīr oğlu Mehmed’e ve sulbiye kebîre kızları olup medîne-i mezbûrede sâkine Ümmügülsüm ve Âişe hatunlara münhasıra olduğu şer‘an müte‘ayyin oldukdan sonra sagīr-i mezbûr Mehmed’in vâlidesi ve kıbel-i şer‘den mansûbe vasîsi olan Meryem bt. Abdullah nâm hatun ile zevcesi mezbûr Âişe Hatun mahzarlarında üzerlerine da‘vâ ve takrîr-i kelâm edip medîne-i mezkûre kurbünde vâki‘ Niğde kasabasında sâkin Süleyman Ağa menzilinde bundan akdem müteveffâ-i mezbûr Arab el-Hâc Mustafa Ağa’ya hayâtında mâlımdan iki bin guruş ikrâz ve teslîm ol dahi ber-vech-i muharrer yedimden iktirâz ve tesellüm ve kabz ve istihlâk edip meblağ-ı mezbûru kable’l-edâ vefât etmekle mezbûretâna suâl olunup müteveffâ-i mezbûrun tereke-i vâfiyesinden meblağ-ı mezbûru bana edâ ve teslîme tenbîh olunması matlûbumdur dedikde gıbbe’s-suâl mezbûre Meryem ve Âişe cevâblarında tereke-i müteveffâ-i mezbûra bi’l-vesâye ve bi’l-verâse vaz‘-ı yedlerini ikrâr lâkin deyn-i mezbûru inkâr etmeleriyle müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden ve hâlâ Bostancıbaşı ağa etbâ‘ından olup bir husûs için Niğde kasabasında bulunduğu müte‘ayyin olan Mahmud Bey b. Hasan ve kasaba-i mezbûre ahâlîsinden olup mahmiye-i mezbûrede Sultan Mehmed Hân -tâbe serâhu- Câmi‘-i şerîfi kurbünde Kadı Hânı’nda müsâfiren sâkin es-Seyyid Mustafa Çelebi b. Halil nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr el-Hâc Ebûbekir Ağa bundan akdem mâlından iki bin guruş vezîriazam-ı sâbık Maktûl İbrahim Paşa’nın hizmetinde silâhşor olup katîlen vefât eden el-Hâc Mustafa Ağa b. Abdullah [36a] b. Abdurrahman’a hayâtında Niğde kasabasında sâkin Süleyman Ağa menzilinde bizim huzûrumuzda ikrâz ve teslîm ol dahi ber-vech-i muharrer iktirâz ve tesellüm ve kabz ve istihlâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettikde gıbbe’t-ta‘dîl ve’t-tezkiye şehâdetleri makbûle olup müdde‘î-i mezbûr tahlîf-i şer‘î ile tahlîf olunmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 10 Cumâdelûlâ sene [1]143. Şuhûdü’l-hâl: Mustafa Odabaşı b. Mehmed, Mustafa Ağa b. Mustafa, Hüseyin b. Mustafa, Salih b. Süleyman, Mehmed Çelebi b. Abdullah.