Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 198 Hüküm no: 171 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden es-Seyyid Mustafa’nın kayın babası Mehmed Efendi ile kardeşi es-Seyyid Süleyman Efendi’nin aralarındaki davada sulh oldukları Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ es-Seyyid Feyzullah Efendi b. el-merhûm Abdülkerim Efendi mahmiye-i İstanbul’da Muradpaşa-yı atîk Mahallesi’nde sâkin iken bundan akdem vefât eden es-Seyyid Mustafa b. es-Seyyid Emrullah b. es-Seyyid Ali’nin hayâtında sâkin olduğu menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-i mezbûrun verâseti zevce-i menkûha-i metrûkesi fahrü’l-muhadderât Râbia Hatun bt. Mehmed Efendi ile babası mezbûr Emrullah’a ve sulbiye sagīre kızları Şerife Âişe ve Şerife Rukiye’ye münhasıra ba‘dehû babası mezbûr Emrullah dahi vefât edip verâseti li-ebeveyn er karındaşı es-Seyyid Süleyman Efendi ve sulbiye kebîre kızı Şerife Eşe nâm hatuna münhasıra ve tashîh-i mes’elesi bi-hükmi’l-münâsahati’ş-şer‘iyye kırk sekiz sehmden olup sihâm-ı mezbûreden altı sehmi zevce-i mersûme Râbia Hatun’a ve on altışar sehmi mezbûretân Şerife Âişe ve Şerife Rukiye’den her birine ve beş sehmi mezbûre Eşe’ye ve beş sehmi merkūm es-Seyyid Süleyman Efendi’ye isâbet ettiği lede’ş-şer‘i’l-enver mütehakkık oldukdan sonra mezbûr es-Seyyid Süleyman Efendi kendi kıbelinden asâleten ve mezbûre Şerife Eşe tarafından dahi husûs-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iyye ârifân olan Süleyman Çelebi b. Ali ve es-Seyyid Ca‘fer b. es-Seyyid Ali nâm kimesneler şehâdetleriyle sâbit olmağla vekâleten meclis-i ma‘kūd-ı mezkûrda mezbûre Râbia Hatun’un babası ve tarafından husûs-ı âti’z-zikre vekîl-i şer‘iyyesi olan bâ‘isetü’l-vesîka mûmâ-ileyh Mehmed Efendi mahzarında bi’l-asâle ve bi’l-vekâle ikrâr-ı tâm ve takrîr-i kelâm edip müteveffâ-i evvel mezbûr es-Seyyid Mustafa’nın işbu kayın babası mûmâ-ileyh Mehmed Efendi zimmetinde cihet-i karz-ı şer‘îden iki bin seksen guruş hakkı olup meblağ-ı mezbûru kable’l-ahz vefât eyledikde meblağ-ı mezbûr iki bin seksen guruşu ketm ve ihfâ ve defter-i kassâma idhâl etmediniz deyü meblağ-ı mezbûrdan tashîh-i mezkûr üzere hisselerimizi mûmâ-ileyh Mehmed Efendi ile kızı müvekkile-i mezbûre Râbia Hatun’dan bi’l-asâle ve bi’l-vekâle taleb ve da‘vâ sudûrunda olduğumda onlar dahi bi’l-külliye inkâr edip ve ben müdde‘âmı isbâta kādir olmamamla beynimizde münâza‘ât-ı kesîre cereyân etmişidi. El-hâletü hâzihî beynimize muslihûn tavassut edip da‘vâ-yı mezkûremden beni mezbûrân ile fedâen ani’l-yemîn seksen guruş üzerine inşâ-i akd-i sulh ettiklerinde ben dahi sulh-ı mezbûru bi’l-asâle ve bi’l-vekâle kabûl ve bedel-i sulh olan meblağ-ı mezbûr seksen guruşu mezbûr Mehmed Efendi yedinden tamamen ahz u kabz eylediğimden sonra meblağ-ı mezbûra ve müteveffâ-i mezbûrun dâhil ve hâric ez-defter terekesine müte‘allika âmme-i de‘âvî ve kâffe-i mütâlebâtdan verese-i mezbûrûndan her birini ibrâ-i âmm-ı râfi‘u’l-hısâm ile bi’l-asâle ve bi’l-vekâle ibrâ ve iskāt eylediğimde mezbûr Mehmed Efendi dahi bedel-i sulh olmak üzere bana medfû‘u olan meblağ-ı mezbûr seksen guruşa müte‘allika âmme-i da‘vâdan benim zimmetimi ibrâ ve iskāt etmeğin min-ba‘d birbirimiz ile vechen mine’l-vücûh kat‘â da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan b. Mehmed ve Muhzır Mehmed b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: Hasan Ağa b. Mustafa, Eyüb Çavuş b. Mehmed, el-Hâc Halil b. Osman, İsmail Beşe b. el-Hâc Yusuf, el-Hâc Ömer b. el-Hâc Mustafa, el-Hâc Yusuf b. Abdullah, İsmail Ağa b. Hasan.