Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 200 Hüküm no: 172 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in vefât eden Mehmed b. Hüseyin b. Abdullah’ın vârisi olduğunu şahitlerle ispat ettiği Fi’l-asl vilâyet-i Rumeli’de Bosna sancağında Mostar kazâsına tâbi‘ Bocireviste nâm karye ahâlîsinden olup mahmiye-i İstanbul’da Ayasofya-i kebîr kurbünde sâkin iken bundan akdem vefât eden Mehmed b. Hüseyin b. Abdullah’ın ber-vech-i âtî vârisi olduğunu iddi‘â eden bâ‘isü hâzihi’l-vesîka Mustafa b. Mehmed nâm kimesne meclis-i şer‘-i hatîr-i lâzımü’t-tevkīrde müteveffâ-i mezbûrun terekesine bi’l-emâne ve bi’l-vesâye vaz‘-ı yedi mütehakkık olan diğer Mustafa Ağa b. el-Hâc Mehmed mahzarında üzerine da‘vâ ve takrîr-i kelâm edip müteveffâ-i mezbûr Mehmed ile benim anam müteveffiye Âişe nâm hatun li-ebeveyn karındaşlar olup babaları ismi mezbûr Hüseyin ve dedeleri ismi mezbûr Abdullah ve anaları ismi Fâtıma bt. Abdullah ve maskat-ı re’sleri mârru’z-zikr Bosna sancağında vâki‘ Mostar kazâsında Bocireviste nâm karye olup müteveffâ-i mezbûrun verâseti zî-rahm cihetinden bana münhasıra ve benden gayrı vârisi ve terekesine müstahik âhar olmayıp hattâ müteveffâ-i mezbûr hayâtında vefâtından bir sene mukaddem lede’ş-şuhûd ikrâr u i‘tirâf etmekle müteveffâ-i mezbûr merkūm Mustafa Ağa’nın hizmetkârı iken vefât etmekle müteveffâ-i mezbûrun ber-mûceb-i defter-i kassâm doksan sekiz buçuk guruş terekesine merkūm Mustafa Ağa bi’l-vesâye vâzı‘u’l-yed olmağın meblağ-ı mezbûru bana teslîme tenbîh olunmak bi’l-verâse murâdımdır dedikde gıbbe’s-suâl merkūm Mustafa Ağa cevâbında müteveffâ-i mezbûrun ber-mûceb-i defter-i kassâm doksan sekiz buçuk guruş terekesine bi’l-vesâye vaz‘-ı yedini ikrâr mâ‘adâyı inkâr etmekle müdde‘î-i mezbûrdan müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve mârru’z-zikr Ayasofya-i kebîr Mahallesi ahâlîsinden Mehmed Beşe b. Mustafa ve Dergâh-ı âlî cebecilerinin beşinci bölüğe mahsûs oda neferâtından diğer Mehmed Beşe b. Mustafa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-i mezbûr Mehmed b. Hüseyin b. Abdullah hayâtında vefâtından bir sene mukaddem müdde‘î-i mezbûr Mustafa için mezbûr Mustafa benim li-ebeveyn kız karındaşım Âişe’nin sadrî kebîr oğlu olmağla zî-rahm cihetinden vârisim olup bundan gayrı vârisim yokdur verâsetim ancak buna münhasıradır deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh vâris-i merkūm Mustafa meclis-i şer‘de iâde-i kelâm edip ânifen edâsına hüküm ve tenbîh olunan meblağ-ı mezbûr doksan sekiz buçuk guruşu vasiyy-i merkūm Mustafa Ağa yedinden bi’t-tamam ve’l-kemâl ahz u kabz edip tereke-i müteveffâ-i mezbûrdan vasiyy-i merkūm Mustafa Ağa yedinde ve zimmetinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 3 Cumâdelûlâ sene [1]143. Şuhûdü’l-hâl: Mehmed Bey b. Mahmud, İbrahim Bey b. Abdülaziz, Hüseyin Çavuş Ağa b. Abdullah, Ömer Ağa b. Abdullah, İbrahim Çavuş.