Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 201 Hüküm no: 173 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babalarından intikal eden ve vasileri tarafından usûlsüz olarak satılan arsanın Ahmed Ağa ve Mustafa’ya iadesi Mahrûse-i Galata kazâsına tâbi‘ Fındıklı kasabasında Ayaspaşa Mahallesi ahâlîsinden iken bundan akdem vefât eden Ya‘kub Ağa b. Ahmed b. Abdullah’ın verâseti zevce-i menkûha-i metrûkesi Emine bt. el-Hâc İbrahim nâm hatun ile sulbî kebîr oğlu Ahmed Ağa ve Mustafa’ya münhasıra ve tashîh-i mes’elesi sekiz sehmden olup sihâm-ı mezbûrdan iki sehmi mezbûre Emine Hatun’a ve üçer sehmi mezbûr Ahmed Ağa ve Mustafa’dan her birine isâbet ve intikāl etmekle bâ‘isi hâze’l-kitâb mezbûrân Ahmed Ağa ve Mustafa meclis-i şer‘-i hatîr-i lâzımü’t-tevkīrde zikri âtî menzile vaz‘-ı yedi sâbit olan Hüseyin Ağa b. Abdullah nâm kimesne mahzarında üzerine da‘vâ ve takrîr-i kelâm edip babamız müteveffâ-i mezbûr Ya‘kub Ağa’nın ile’l-vefât yedinde mülkü olup Mahmiye-i İstanbul’da Hocapaşa Mahallesi’nde vâki‘ etrâf-ı erba‘adan el-Hâc Mahmud ve Kasab Mehmed menzilleri ve tarîk-i hâs ve tarîk-i âm ile mahdûd taş duvar ile muhâta iki kat kârgîr mahzen ve bir hamamı muhtevî menzil arsası ba‘de’l-vefâtihi hâl-i sıgārımızda bize mevrûs olup lâkin vasiyy-i mansûbumuz olan el-Hâc İbrahim nâm kimesne babamız müteveffâ-i mezbûrun arsa-yı mezkûreden mâ‘adâ nukūd ve eşyâ ve menzil makūlesi emvâl-i kesîresi olup bey‘e zarûret-i deyn ve nafaka ve sâir müsevvagāt-ı şer‘iyyeden bir türlü müsevvig-i şer‘î yoğiken arsa-yı mezbûremizi bi-gayr-ı vech-i şer‘î İmâm Hasan Efendi nâm kimesneye bey‘ ve teslîm ol dahi ba‘de’l-iştirâ ve’l-binâ vefât edip veresesi işbu mezbûr Hüseyin Ağa’ya bey‘ ve teslîm etmekle bey‘-i mezkûrun ber-vech-i muharrer adem-i sıhhatine binâen arsa-yı mezbûremizden kasr-ı yed ve bize teslîme mezbûr Hüseyin Ağa’ya tenbîh olunmak matlûbumuzdur deyü her biri da‘vâ eylediklerinde gıbbe’s-suâl mezbûr Hüseyin Ağa cevâbında menzil-i mezbûr fi’l-asl müdde‘iyân-ı mezbûrânın babalarından müntakil mülk-i mevrûsları olup ba‘dehû vasîleri mezbûr el-Hâc İbrahim bey‘ ve ber-vech-i muharrer ben dahi iştirâ ve tesellüm etmemle vaz‘-ı yed ederim deyü ikrâr lâkin müdde‘iyân-ı mezbûrânın ber-vech-i meşrûh nafaka ve kisvelerine vâfiye sâir mâlları olduğunu inkâr edicek müdde‘iyân-ı mezbûrândan müdde‘âlarına mutâbık beyyine taleb olundukda udûl-i ahrâr-ı ricâl-i Müslimînden [37a] ve mârru’z-zikr Fındıklı kasabasında vâki‘ Ayaspaşa Mahallesi ahâlîsinden Mehmed Çelebi b. Ahmed ve Abdurrahman Efendi b. Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iyân-ı mezbûrân Ahmed Ağa ve Mustafa’nın babaları müteveffâ-i mezbûr Ya‘kub Ağa b. Ahmed b. Abdullah’ın arsa-yı mezkûreden mâ‘adâ nukūd ve eşyâ ve menzil makūlesi emvâl-i kesîresi olup arsa-yı mezbûreyi bey‘e bir vechile zarûret-i deyn ve nafaka ve sâir müsevvagāt-ı şer‘iyyeden bir türlü müsevvig-i şer‘îleri yoğiken vasîleri mezbûr el-Hâc İbrahim arsa-yı mezbûreyi müteveffâ-i mezbûr İmâm Hasan Efendi’ye bey‘ eyledi hâlâ bey‘-i mezbûrun adem-i sıhhatine binâen arsa-yı mezbûrenin reddi lâzımdır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm arsa-yı mezkûreyi ba‘de tefrîği’ş-şevâgil müdde‘iyân-ı mezbûrâna red ve teslîme mezbûr Hüseyin Ağa’ya tenbîh-birle mâ-vaka‘a bi’t-taleb ketb olundu. Fî-gurreti Cumâdelûlâ sene [1]143. Şuhûdü’l-hâl: Mehmed Ağa b. Mehmed kethüdâ-yı muhzırân, Mehmed Çelebi b. Abdullah, Salih Çelebi b. Süleyman, Mehmed Çelebi b. Abdullah.