Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 116 Hüküm no: 52 Orijinal metin no: [6a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul, Galata, Üsküdar ve Eyüp’deki çingenelerin vergilerinin mukâtaaya verildiği Bi’l-fi‘l çingeneler beyi olan fahrü’l-emâsil ve’l-akrân Fazlı Çavuş’un vekîl-i mutlakı olan Yusuf b. Arslan nâm kimesne mahfil-i kazâda işbu râğıbü’l-kitâb Yolcu b. Abdullah nâm kıbtî muvâcehesinde takrîr-i merâm kılıp nefs-i İstanbul ve Galata ve Üsküdar ve Medîne-i Hazret-i Eyüb Ensârî’de sâkin olup defterde esâmîsi mastûr çingenelerin cerîme ve cürm-ı cinâyet ve bâd-ı hevâ ve resm-i arûs ve sâir rüsûm-ı örfiyyeleri kadîmden ola geldiği üzere zabt ve kabz için mezbûr Yolcu subaşı ta‘yîn olundu şol şart üzre ki târih-i kitâbdan her ay başında bin altı yüz altmış altı akçeyi mezbûr Yolcu edâ ede ki cem‘an bir yılda yirmi bin akçe olur ve iki aylık yevmü’l-kıst ki üç bin üç yüz otuz iki akçe olur ber vech-i peşîn edâ eyleye ve şöyle ki bir ay yevmü’l-kıst edâda te’hîr oluna mukāta‘a âhara tevcîh oluna ve yevmü’l-kıstı edâ için yarâr ve mu‘temed kefîller vere dedikde mezbûr Yusuf’un kelimâtı meşrûhasını mesfûr Yolcu vicâhen ve şifâhen tasdîk ve tahkīk ettikden sonra zümre-i kıbtiyândan Tatlu b. Musli ve Gülistan b. Mustafa ve Budak b. Abdullah ve Mehmed b. Bâli hâzır çingeneler bir yıllık iltizâm olunan yirmi bin akçeye ber minvâl-i mezbûr üzerine her ayda bin altı yüz altmış akçe verilmek üzre kefîl olduk deyu her biri i‘tirâf ettiklerinde mâ hüve’l-vâki‘ alâ vukū‘ihi gıbbe’l-ibtigā ber sebîl-i temessük ketb ve imlâ olunup yed-i tâlibe def‘ olundu ki lede’l-hâce müzekkir-i mâ-cerâ ola. Tahrîren fî gurre-i Rebî‘ilâhir li sene elf. Şuhûdü’l-hâl: El-Hâc Ali b. Mehmed, Ali b. Yusuf, Mehmed b. Abdullah, Yunus b. Abdullah, Yahya b. Şehriban, Yunus b. Abdullah, Hızır b. Abdullah, el-Hâc Mehmed b. Muharrem, el-Hâc Yıldırım b. Ramazan, Abdi b. Şaban, Abdi b. Mehmed ve gayruhüm