Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 208 Hüküm no: 180 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanayil v. Karagöz’ün Niğde kazasına bağlı Fertik köyündeki evini ve bağını oğlu Karagöz’e sattığı Fi’l-asl vilâyet-i Anadolu’da Niğde kazâsına tâbi‘ Fertik nâm karye ahâlîsinden olup Mahmiye-i İstanbul’da Silivrikapısı kurbünde İbrahimpaşa Mahallesi’nde sâkin bostancı tâifesinden Tanayil v. Karagöz nâm zimmî meclis-i şer‘-i şerîf-i enverde sulbî kebîr oğlu râfi‘u hâze’s-sifr Karagöz nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülk ve hakkım olup karye-i mezkûre sınırı dâhilinde vâki‘ bir tarafdan Bünyad v. Kostantin ve bir tarafdan Karamanoğlu İstefan zimmî mülkleri ve iki tarafdan tarîk-i âm ile mahdûd tahtânî dört bâb kârgîr oda ve bir ahır ve bir mikdâr bahçeyi muhtevî menzil ile karye-i mezkûre kurbünde vâki‘ lede’l-ahâlî ve’l-cîrân ma‘lûmü’l-hudûd üç ırgadlık bağ ve Alipaşa havlusu demekle ma‘rûf mahalde vâki‘ iki ırgadlık bağ ve Çoğanlık nâm mahalde vâki‘ beş ırgadlık bağ ve Lağros nâm mahalde vâki‘ üç ırgadlık bâğımı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yüz guruşa oğlum mezbûr Karagöz’e safka-i vâhide ile bey‘ ve temlîk ve mahallinde kabz ve tesellüme taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yüz guruşa müte‘allika âmme-i de‘âvî ve mütâlebât ve eymân ve muhâsamâtdan oğlum mezbûrun zimmetini ibrâ-i âmm-ı râfi‘u’l-hısâm ile ibrâ ve iskāt eyledim fîmâ-ba‘d emlâk-ı mezkûre oğlum merkūm Karagöz’ün mülk-i müşterâsı olup kat‘â benim alâka ve medhalim kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 14 Cumâdelûlâ sene [1]143. Şuhûdü’l-hâl: Mehmed Ağa b. Abdullah, Molla Ali b. Mehmed Ağa, es-Seyyid Ali b. Şa‘ban, Ali b. Abdullah, Salih Çelebi b. Süleyman, Anton v. Bradomo, Anaşdaş v. Saniye, Anaşdaş v. Yorgi, Durmuş v. Tanayil, Dolet v. Tanayil, Anaştaş v. Rabil, Damil v. Apastol.