Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 209 Hüküm no: 181 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanayil v. Karagöz’ün Niğde kazasına bağlı Fertik köyündeki evini ve bağını oğlu Aslan’a sattığı Vilâyet-i Anadolu’da Niğde kazâsına tâbi‘ Fertik nâm karye ahâlîsinden olup Mahmiye-i İstanbul’da Silivrikapısı kurbünde İbrahimpaşa Mahallesi’nde sâkin bostancı tâifesinden Tanayil v. Karagöz nâm zimmî meclis-i şer‘-i şerîfde sulbî kebîr oğlu râfi‘u hâze’s-sifr Aslan nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülk ve hakkım olup karye-i mezkûrda vâki‘ etrâf-ı erba‘adan diğer oğlum Karagöz ve Bünyad ve Karamanoğlu İstefan ve tarîk-i âm ile mahdûd tahtânî dört bâb kârgîr oda ve bir ahırı muhtevî mülk menzil ile karye-i mezkûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd altmış karık bağımı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yüz guruşa oğlum mezbûr Aslan’a bi-safkatin vâhidetin bey‘ ve temlîk ve mahallinde kabz ve tesellüme taslît eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz guruşa müte‘allika âmme-i de‘âvî ve mütâlebât ve eymân ve muhâsamâtdan oğlum mezbûr Aslan’ın zimmetini ibrâ-i âmm-ı râfi‘u’l-hısâm ile ibrâ ve iskāt eyledim min-ba‘d zikrolunan menzil ve bağ oğlum mezbûr Aslan’ın mülk-i müşterâsı olup kat‘â benim alâka ve medhalim kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Cumâdelûlâ sene [1]143. Eş-şâhidûn: Es-sâbikūn.