Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 209 Hüküm no: 182 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakol v. Yuvan v. Lofça’ın ölen kardeşi Dino v. Yuvan v. Lofça’da olan alacağını şahitlerle ispatladığı Vilâyet-i Rumeli’de Silivri [Sevri]kazâsına tâbi‘ Tetevon nâm karye ahâlîsinden celeb tâifesinden olup Mahmiye-i İstanbul’da Yedikule hâricinde sâkine bâ‘isü’s-sifr Nakol v. Yuvan nâm zimmî meclis-i şer‘-i şerîf-i enverde yine tâife-i mezbûreden merkūm Nakol’un li-ebeveyn er karındaşı olup bundan akdem maktûlen hâlik olan Dino v. Yuvan v. Lofço nâm zimmînin verâseti karye-i mezbûrede sâkinler zevce-i metrûkesi Ustoyoki v. [bt.] Yuvan nâm Nasrâniye ile babası mezbûr Yuvan ve anası Kino bt. Dino nâm Nasrâniyeye ve sulbî oğlu diğer Yuvan ve sulbiye kızı Dino nâm Nasrâniye sagīrâna münhasıra olduğu şer‘an zâhir ve mütehakkık oldukdan sonra hâlik-i mezbûrun terekesini kabz ve düyûn-ı müsbetesini edâya ve fazlasını verese-i mezkûrûn için ahz u hıfza kıbel-i şer‘den vasî ve kayyûm nasb olunmağla tereke-i hâlik-i mezbûra bi’l-vesâye vâzı‘u’l-yed olan Serko v. Yuvan nâm zimmî muvâcehesinde üzerine da‘vâ ve takrîr-i kelâm edip karındaşım hâlik-i mezbûr Dino v. Yuvan v. Lofço’ya? hâl-i hayât ve kemâl-i akl ve sıhhatinde koyun bey‘ u şirâ edip hâsıl olan fâide beynimizde re’s-i mâlımıza göre iktisâm olunmak üzere kendi mâlımdan beş yüz elli guruş def‘ ve teslîm ol dahi ber-vech-i muharrer yedimden ahz u kabz edip meblağ-ı mezbûru bana edâ etmedin (etmeden) zimmetinde iken hâlik olmağın hâlâ vasiyy-i mezbûra suâl olunup makbûzu olan tereke-i hâlik-i mezbûrdan alıverilmek matlûbumdur dedikde gıbbe’s-suâl vasiyy-i merkūm Serko cevâbında tereke-i hâlik-i mezbûra ber-vech-i meşrûh bi’l-vesâye vaz‘-ı yedini ikrâr lâkin müdde‘î-i merkūm Nakol’un ber-minvâl-i muharrer müdde‘âsını ba‘de’l-inkâr müdde‘î-i mezbûrdan müdde‘âsına mutâbık beyyine taleb olundukda ahrâr-ı ricâl-i Nasârâ’dan celeb tâifesinden İspire v. Lazo ve Ostiyan v. Ostiyan ve Gorki v. Mardiros nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu müdde‘î-i mezbûr Ostiyan [Nakol] karındaşı hâlik-i mezbûr Dino v. Yuvan v. Lofço’ya? hâl-i hayât ve kemâl-i akl ve sıhhatinde koyun bey‘ u şirâ edip hâsıl olan fâide beynlerinde re’s-i mâllarına göre iktisâm olunmak üzere bizim huzûrumuzda kendi mâlından beş yüz elli guruş def‘ ve teslîm edip hâlik-i mezbûr dahi yedinden ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde gıbbe ri‘âyetihî şerâiti’l-kabûl şehâdetleri makbûle olmağın gıbbe’t-tahlîfü’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 18 Cumâdelûlâ sene [1]143. Şuhûdü’l-hâl: Mustafa Efendi İmâmzâde, Mehmed Çelebi tahtacı, Berber Abdullah Çelebi b. Abdurrahman, Süleyman Çelebi b. Mustafa, Mehmed Çelebi b. Ahmed.