Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 210 Hüküm no: 183 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayri bt. Hasan’ın kocası İbrahim Beşe b. Mehmed’den annesinin velâyetiyle muhala‘a yoluyla boşandığı Muhâla‘a. Fi’l-asl vilâyet-i Anadolu’da Gemlik kazâsına tâbi‘ Fıstıklı nâm karye sâkinelerinden olup mahmiye-i İstanbul’da Kumkapı kurbünde Kâtib Kasım Mahallesi’nde müsâfiren sâkine ve zâtı karye-i mezbûre imâmı Mehmed Çelebi b. el-Hâc Ahmed ve Mehmed Beşe b. Hasan nâm kimesneler ta‘rîfleriyle mu‘arrefe olan Halime bt. Şa‘ban nâm hatun meclis-i şer‘-i şerîf-i enverde işbu sagīre kızı Hayri bt. Hasan’ın zevc-i dâhili işbu râfi‘u’l-kitâb İbrahim Beşe b. Mehmed nâm kimesne mahzarında bi’l-velâye takrîr-i kelâm edip mezbûr İbrahim Beşe kızım sagīre-i mezbûre Halime’nin zevci olup beynlerinde hüsn-i mu‘âşeretleri olmamağla zimmetinde mütekarrir ve ma‘kūdun-aleyh elli guruş mehr-i müeccelinin on altı guruşunu bana def‘ ve teslîm ben dahi bi’l-velâye yedinden ba‘de’l-kabz bâkī otuz dört guruş mehr-i müecceli ve nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere zevci mezbûr İbrahim Beşe ile bi’l-velâye muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mezbûre Halime Hatun <> meclis-i şer‘de mezbûr İbrahim Beşe mahzarında kızım sagīre-i mezbûre Hayri ba‘de’l-bülûğ bâkī-i mehr-i mezkûr otuz dört guruşu mezkûr İbrahim Beşe’den taleb ve da‘vâ ve ahz u kabz ederse me’hûzuna ben kefîl ve zâmin oldum dedikde mâ-vaka‘a bi’t-taleb ketb olundu. Fî 18 Cumâdelûlâ sene [1]143. Şuhûdü’l-hâl: Mehmed Halîfe b. el-Hâc Ahmed, Mehmed Beşe b. Hasan, es-Seyyid Mustafa b. Abdulkādir, Salih Beşe b. Hasan, İbrahim Beşe b. Hasan, İvaz b. Abdullah, İbrahim b. Şa‘ban, İbrahim b. Mustafa, Kasım Mehmed b. el-Hâc Hüseyin.