Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 211 Hüküm no: 184 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Diyar-ı âhara giden eski Kasaplar Bölükbaşısı Hasan b. Abdullah’ın karısı ve çocuğuna nafaka bağlanması Nafaka. Mahmiye-i İstanbul’da Canbaziye Mahallesi sâkinlerinden olup zâtı Çorbacıbaşı Hüseyin Ağa b. Hüsam ve Ahmed Çelebi b. Mustafa ta‘rîfleriyle mu‘arrefe olan işbu bâ‘isetü’l-vesîka Hadice bt. Mustafa nâm hatun meclis-i şer‘-i şerîf-i enverde takrîr-i kelâm ve tâ‘bir ani’l-merâm edip sâbıkā Kasablar Bölükbaşısı Hasan b. Abdullah nâm kimesne zevcim olup beni ve mezbûrun firâşından hâsıl ve benden mütevellide işbu sagīre kızım Fâtıma’yı bilâ-nafaka ve lâ-münfik-i şer‘î bırağıp diyâr-ı âhara gitmekle zevcim gāib-i mezbûr Hasan üzerine kıbel-i şer‘den kadr-i ma‘rûf meblağ farz ve takdîr olunmak matlûbumdur dedikde hâl bâlâda zikrolunan minvâl üzere idiğini zeyl-i vesîkada muharrerü’l-esâmî Müslimîn ihbârlarıyla müte‘ayyin olup mezbûre Hadice Hatun tahlîf-i şer‘î ile tahlîf olundukdan sonra hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi mezbûre Hadice Hatun ile sagīre-i mezbûre Fâtıma’nın nafakalari’çün zevci gāib-i mezbûr Hasan üzerine târih-i kitâbdan külle yevm her birine dörder paradan cem‘an sekiz para farz ve takdîr edip meblağ-ı mefrûz-ı mezbûru nafakalari’çün harc ve sarfa ve lede’l-iktizâ istidâneye ve inde’z-zafer zevci gāib-i mezbûr Hasan üzerine rücû‘a mezbûre Hadice Hatun’a izin verilmeğin mâ-hüve’l-vâki‘ bi’t-taleb ketb olundu. Fî 19 Cumâdelûlâ sene [1]143. Şuhûdü’l-hâl: Çorbacı Hüseyin Ağa b. Hüsam, el-Hâc Süleyman b. Mustafa, Ahmed Çelebi b. Mustafa, Dâmâd İbrahim b. Abdullah, Mehmed Çelebi b. Abdullah, Salih b. Süleyman, Mehmed Çelebi b. Abdurrahman, Mustafa Çelebi muhzır-ı keşf.